17 oktyabr 2012 14:27
Tuayev: Foqtsun yeganə çatışmazlığı komandamıza normal əks-hücum etməyi öyrədə bilməməsidi
AFFA İcraiyyə Komitəsinin üzvü Kazbek Tuayev futbol üzrə Azərbaycan yığmasının DÇ-2014-ün seçmə mərhələsi çərçivəsindəki Rusiyaya qarşı oyununu şərh edib. Azerisport.az xəbər verir ki, o, 0:1 hesabıyla başa çatan görüşlə bağlı bunları dilə gətirib:
“Bu, komandamızın səfər oyunu üçün heç də ən pis nəticələrdən biri sayıla bilməz. Amma nəticə daha yaxşı ola bilərdi. Təbii ki, hakim olmasaydı. Onun yanlış qərarı olmasaydı, yığmamız heç-heçəyə nail ola bilərdi. Məgər belə penalti təyin edərlər? Açıq deyim ki, o hakim oyuna hazır deyildi. Müdafiədə pis oynamadıq. Foqtsun yeganə səhvi ondadı ki, bu qədər illər ərzində komandamıza normal əks-hücum etməyi öyrədə bilməyib. Bu oyunda bir-iki normal əks-hücum qurmağımız lazım idi. Buna nail ola bilsəydik, daha fərqli nəticə qeydə alına bilərdi. Həm də mən Branimir Subaşiçin meydana buraxılmasının səbəbini başa düşmədim. O, komandamızın düz altı hücumunu boşa verdi. Rauf Əliyev oynasaydı, daha yaxşı ola bilərdi”.
Tuayev rəqib komandanın oyununu daha kəskin tənqid edib: “Rusiya yığmasında komanda oyunu yoxdu, biabırçılıqdı. Orda cəmi bir futbolçu var – Roman Şirokov. Qalanlarını heç futbolçu da adlandırmaq olmur. Düzdü, 12 xal toplayıblar. Amma ruslar bu oyunla dünya çempionatına getməyə çətin ki, nail ola bilərlər. Yeri gəlmişkən, bir dəfə Şirokov öz Tvitterində rəqiblərindən birini kolxoz komandası adlandırmışdı. Mənə maraqlıdı, o, öz komandasını hansı kolxoza aid edərdi”?
Tuayev həmçinin Azərbaycan əsilli Aleksandr Səmədovun yığmamıza qarşı oynamasından da danışıb: “Böyük Fuad Musayev vaxtilə Səmədovun xidmətindən imtina etməklə düzgün addım atdı. O, futbolçudu ki? O vaxt bu oyunçundan ona görə imtina edildi ki, patriot hissi yox idi. Onda Azərbaycana meyl yox idi”.
