17 oktyabr 2012 11:56
Vaqif Cavadov: Rusiya ilə oyunda bizdə ustalıq səviyyəsi çatışmadı
Futbol üzrə Azərbaycan yığmasının hücumçusu Vaqif Cavadov DÇ-2014-ün seçmə mərhələsi çərçivəsində Rusiyaya qarşı keçirdikləri oyunu şərh edib. Azerisport.az saytına müsahibəsində o, 0:1 hesabıyla başa çatan görüşdən sonra öncə bunları dilə gətirib:
“Biz müdafiədən oynayırdıq. Öz oyunumuzu diqtə etdirməyə cəhd göstərmirdik. Əlbəttə, vəziyyəti dəyişmək üçün də müəyyən şanslarımız var idi. Sadəcə, bizdə ustalıq səviyyəsi çatışmadı”.
Vaqif bu məğlubiyyətə görə çox üzüldüklərini gizlətmir: “Çünki biz artıq xal qazandığımıza inanmışdıq. Amma eybi yoxdu. Bakıda qələbə qazanmağa çalışacağıq”.
Cavadov hakimin penalti qərarına da münasibətini açıqlayıb: “Penalti yox idi. Amma makedoniyalı hakim fərqli qərar verdi. Artıq bu oyunu unutmağımız lazımdı. Qarşıdakı görüşləri düşünməliyik”.
Millimizin üzvü rəqib qapısı qarşısında təhlükə yarada bilməmələrinə də toxunub: “Biz həqiqətən də rəqib qapısı qarşısında təhlükəli vəziyyətlər yarada bilmirdik. Amma necə komanda ilə qarşılaşdığımızı unutmayın. Rusiya yığması hədiyyə deyil. Çox güclü komandadı”.
Vaqif etiraf edib ki, onlar ruslara qarşı məhz bu komandanın Portuqaliya qarşısında sərgilədiyi oyunu göstərməklə uğur qazanmaq istəyirmişlər: “Biz Rusiya yığması kimi oynamaq istəyirdik. Əsas diqqəti müdafiəyə yönəldib, əks-hücumda qol vurub, qələbə qazanmaq istəyirdik. Amma təəssüf ki, bu, bizdə alınmadı”.
