19 oktyabr 2012 12:27
Lider üçün xoşagəlməz statistika
Futbol üzrə Azərbaycan Premyer Liqanın 9-cu turunun qarşıdan gələn "İnter" - "Simurq" görüşü hər iki komanda üçün sayca 15-ci olacaq. Azerisport.az xəbər verir ki, bunadək komandalar 14 dəfə qarşılaşıblar.
12 oyun çempionat çərçivəsində keçirilib, 2 matç isə ölkə kubokunun payına düşür. “İnter” rəqibini 12 dəfə məğlub edə bilib, "Simurq" isə ancaq 1 qələbəyə malikdi. 14 oyunun 1-i heç-heçə ilə başa çatmışdı. Vurulan topların fərqi də "İnter"in xeyrinədi - 25:8.
Komandalar ilk dəfə 2006-cı ilin avqust ayında çempionat çərçivəsində üz-üzə gəlib. "Şəfa" stadionuna baş tutmuş həmin görüş 2:0 hesabıyla "İnter"in xeyrinə başa çatmışdı.
Xatırlardaq ki, ötən mövsümdə komandalar bir-birilə iki dəfə qarşılaşıblar və hər iki oyunda "İnter" rəqibini məğlub edib. "Şəfa" stadionunda “İnter” rəqibini 1:0 hesabıyla üstələyib, Zaqatalada keçirilən görüşdə isə "İnter" "Simurq"un qapısına 2 cavabsız qol vurub.
"İnter” - "Simurq" oyunlarında ən populyar hesab 2:0-dı. Belə nəticə 14 görüşün 6-da qeydə alınıb. "İnter" - "Simurq" qarşılaşmaların tarixində ən böyükhesablı nəticə 3:4 hesabıdı. 2008-cı ildə komandamız "Simurq"u məhz bu hesabla udmuşdu.
Azərbaycan çempionatında "Simurq"a qarşı keçirilən ev oyunlarında “İnter” böyük üstünlüyə malikdi. Belə ki, 6 qarşılaşmanın hamısında “İnter” rəqibini məğlub etməyi bacarıb. Bu matçlarda top fərqi "İnter"in xeyrinədi - 10:1.
Qeyd edək ki, "İnter" - "Simurq" matçı oktyabrın 20-də keçiriləcək. Oyun saat 18.00-da başlayacaq.
