25 oktyabr 2012 00:11
“Neftçi ilə oyunda xal itkisi haqda düşünmək belə istəmirəm”
Rusiyanın “Rubin” klubunun yarımmüdafiəçisi Alan Kasayev UEFA Avropa Liqasının qrup mərhələsi çərçivəsində Azərbaycan çempionu “Neftçi”yə qarşı keçirəcəkləri oyun öncəsi fikirlərini açıqlayıb. Azerisport.az xəbər verir ki, o, Kazanda baş tutacaq qarşılaşma ilə bağlı bunları dilə gətirib:
“Biz hər oyunda qələbə üçün mübarizə aparırıq. CSKA ilə sonuncu çempionat oyununda məğlub olmağımızda ilk qolun rolu böyük idi. Çünki qapımıza təyin olunan penaltiyə görə mübahisə etmək olardı. Amma biz artıq həmin oyunu unutmuşuq. Qarşıda növbəti oyunlar var. Onları düşünməliyik. “Neftçi”yə gəlincə, bu komandanın oyununu izləmişəm. Komanda oyunu sərgiləməyə üstünlük verirlər. Xüsusi olaraq kimisə qeyd etmək istəməzdim. Mümkündü ki, bu komanda ilə ilk görüşümüzdən sonra kimisə fərqləndirmək olar. “Rubin” tərəfdən rəqibi düzgün qiymətləndirməmək ola bilməz. Biz evdə oynayacağıq. Qələbə qazanmaq bizim üçün çox vacibdi. Ona görə də hücumda daha yaxşı oynamağa çalışacağıq. Ən əsası isə öz oyunumuzu göstərmək istəyirik. Lakin bizi çətin oyun gözləyir. Çünki avrokuboklarda başqa cür ola da bilməz. “Neftçi” ilə oyunda xal itkisi barədə düşünmək belə istəmirəm. Kim güclüdürsə, o da qalib gələcək”.
