26 oktyabr 2012 15:06
Topaz Premyer Liqası, 10-cu tur: Musa Qurbanovun proqnozu
Azərbaycanın futbol mütəxəssisi Musa Qurbanov azerisport.az saytına müsahibəsində Topaz Premyer Liqasının 10-cu turunun oyunları ilə bağlı proqnozlarını açıqlayıb.
Bakı – İnter
“İnter” həmişə güclü rəqib olub. Onlara qarşı oynamaq asan olmur. “Bakı” üçün isə bu komanda ilə oyunda qazanılacaq qələbə uğursuzluq zolağından çıxmaq üçün mühüm rol oynaya bilər. Amma mən bu görüşdə heç-heçə olacağını düşünürəm.
Kəpəz – Sumqayıt
Oyunun Gəncədə keçiriləcəyini nəzərə alsaq, “Kəpəz”in qələbə qazanmaq şansları daha yüksəkdi. “Sumqayıt” da mövsümə yaxşı başlayıb. Amma bu komandanın futbolçularında təcrübə çatışmır. “Kəpəz”in qələbə qazanacağını düşünürəm.
Simurq – AZAL
Düzünü deyim ki, bu oyuna proqnoz verməkdə çətinlik çəkirəm. Oyunun Zaqatalada keçirilməsin, “Simurq”un lider olmasına baxmayaraq, hər iki komandanın qələbə qazanması mümkündü. Heç-heçə də istisna deyil.
Qəbələ - Turan
Ramiz Məmmədovun gəlişindən sonra “Qəbələ”də oyun intizamının yaxşılaşdığı hiss olunur. “Turan” da baş məşqçi dəyişikliyinə rəğmən, qələbə qazanmağı bacardı. Amma qəbələlilərin ustalıq səviyyəsi daha yüksəkdi. Buna görə də meydan sahiblərinin qələbə qazanacağını düşünürəm.
Xəzər Lənkəran – Qarabağ
Özünüz də başa düşürsünüz ki, mən burada maraqlı tərəfəm. Ona görə də proqnoz vermək düz çıxmazdı. Amma bütövlükdə, hər cür nəticə qeydə alına bilər.
Rəvan – Neftçi
Əgər oyun nəzərdə tutulduğu vaxtda keçirilsə, “Neftçi”yə pis təsir edə bilər. Çünki yorğunluq öz sözünü deyə bilər. Bu, “Rəvan” üçün əlavə üstünlük deməkdi. Amma mən heç-heçə olacağını düşünürəm.
