26 oktyabr 2012 00:23
Böyükağa Hacıyev: Təkcə Rondonun qiyməti Neftçinin ilyarımlıq büdcəsinə bərabərdi
“Neftçi”nin baş məşqçisi Böyükağa Hacıyev Avropa Liqasında Rusiya “Rubin”inə qarşı keçirdikləri oyunu şərh edib. Azerisport.az xəbər verir ki, o, 0:1 hesabıyla uduzduqları oyundan sonra öncə bunları dilə gətirib:
“Hələ dünən də demişdim ki, biz müdafiə haqda düşünməyəcəyik. Meydan sahibləri də çoxlu hücumlar edirdilər. Amma ələ düşən imkanları dəyərləndirə bilmədilər. Bizim üçün Avroliqanın qrup mərhələsi böyük təcrübədi. Çünki heyətimizdə çoxlu gənc futbolçular var. Ona görə də oyuna ehtiyatlı başladıq. Əgər bizim də avrokuboklar təcrübəmiz çox olsaydı, “Neftçi” tam başqa cür oynayardı. Amma “Rubin”ə Bakıda çətin olacaq”.
“Futbolçular robot deyil, canlı insanlardılar. Flavinyo bütün il boyu yaxşı oyunuyla seçilir. Ona görə də bir oyunla onu tənqid etmək düzgün olmazdı. Bu gün onun meydandakı yerini dəyişəndən sonra daha yaxşı oynamağa başladı. O, həqiqətən də yaxşı futbolçudu. Bahodir Nasimov uzun müddətdi zədə səbəbindən oynaya bilmir. Mənə demişdilər ki, sentyabrda o, sıraya dönəcək. Bu üzdən yeni hücumçu almağın mənasız olduğunu düşündüm. Çünki yeni futbolçuya uyğunlaşmaq üçün də vaxt lazım idi. Həmin vaxta qədər də Avropa Liqası başa çatmış olardı” deyə, Hacıyev sözlərinə davam edib.
"Neftçi"nin çalışdırıcısı daha sonra bunları söyləyib: “Rubin” varlı klubdu. Əgər kimsə “Neftçi”ni daha varlı klub sayırsa, bu, elə deyil. Elə təkcə Rondon 10 milyon dollardı. Bu isə “Neftçi”nin ilyarımlıq büdcəsinə yaxındı. Pul olan yerdə işləmək də çətin olmur. Azərbaycanda bizim əsas rəqibimiz “Xəzər Lənkəran”dı. Ötən mövsüm “Neftçi” onlara avtoqolla məğlub olanda Mirça Rednik demişdi ki, mənim komandamı onun nənəsi də məğlub edə bilərdi. Onun bu sözü məni çox təsirləndirdi. Bundan bir qədər sonra isə biz onları 5:0 hesabıyla məğlub etdik”.
