29 oktyabr 2012 11:05
Mövsümün rekordçusu bəlli oldu
Bakının “İnter” klubu Topaz Premyer Liqasının 2012/13-cü il mövsümünün rekordçusu olub. Azerisport.az xəbər verir ki, 10-cu turun “Bakı” ilə keçirilən qarşılaşmasında (0:0) qol buraxmayan “bankirlər” ardıcıl 5-ci qarşılaşmada qapısını toxunulmaz saxlayıb.
Kaxaber Tsxadadzenin yetirmələri sonuncu dəfə avqustun 25-də “Turan”la matçda qol buraxıb. Həmin görüşün 84-cü dəqiqəsində Georgi Lomayanı məyus edən Azər Məmmədov hələlik “İnter”in qapısına qol vuran sonuncu futbolçudu.
Mövsümün rekordu
Ardıcıl 5-ci quru oyununu keçirən “İnter” cari mövsümün “Simurq”a məxsus rekordunu arxada qoyub. Belə ki, zaqatalalılar ardıcıl 4 matçda qol buraxmamışdı. Onlar 2-5-ci turlarda qapısını toxunulmaz saxlamışdı.
Petrkeviç hələ də zirvədə
Lakin “Simurq” klubunun qapıçısı David Petrkeviçə məxsus mövsümün fərqli rekordu hələ də qırılmayıb. Belə ki, 380 dəqiqə boyu komandasının qapısını toxunulmaz saxlayan polşalı legionerdən fərqli “İnter”in seriyasını 1 deyil, 2 qapıçı davam etdirib. Quru oyunlardan 3-də Georgi Lomaya, 2-də Revaz Tevdoradze qapıda durub. Bu isə o deməkdi ki, son qolu buraxan Lomayanın seriyası 366 dəqiqəyə çatıb. Revaz isə hələ də ölkəmizdə qol buraxmayıb. Georginin Davidin rekordunu qırması üçün cəmi 15 dəqiqə lazımdı.
Tarixdə 3-cü dəfə
“İnter”in ardıcıl 5 oyun qapısından qol buraxmaması təkcə mövsümün deyil, həm də klubun öz rekordudu. Belə ki, nə 2004-cü ilə kimi “Xəzər Universiteti”, nə də həmin vaxtdan “İnter” olan komanda bundan artığını bacarmayıb. Bakılılar 2004/05 və 2007/08 mövsümlərindəki ən uzun quru seriyalarında da indiki kimi 5 matç qapısını toxunulmaz saxlayıb. 5 ildən sonra rekordunu növbəti dəfə təkrarlayan “İnter” artıq növbəti turda klub tarixinin yeni nailiyyətinə imza ata bilər.
Maraqlıdı ki, indi olduğu kimi əvvəlki 5 matçlıq seriyalar da 1 deyil, bir neçə qapıçının əməyi sayəsində mümkün olmuşdu. 2004/05 mövsümündə 19-23-cü turlarda Vitali Varivonçik və Konstantin Qusev 484, 2007/08 mövsümündə 8-12-ci oyunlarında Svilen Semyonov, Elxan Həsənov və Cahangir Həsənzadə ümumilikdə 495 dəqiqə “İnter”in qapısını “kilidləmişdi”. İndi isə bu seriya 456 dəqiqəyə bərabərdir. Dəqiqə baxımında ən uzun seriyanın müəyyənləşməsinə isə 40 dəqiqə də kifayətdi.
