4 noyabr 2012 01:38
Neftçinin rəqibləri həftəni səfər qələbələri ilə başa vurdular (YENİLƏNİB)
Bu gün İtaliya, Rusiya və Serbiya çempionatlarında növbəti turun oyunları keçirilib. Azerisport.az xəbər verir ki, Avropa Liqasının qrup mərhələsində Azərbaycan çempionu “Neftçi”nin rəqibi olan klublar da növbəri sınaqlarına çıxıblar.
Belqrad “Partizan”ı Serbiya Super Liqasının 11-ci turunda səfərdə “Radnicki” ilə üz-üzə gəlib. “Neftçi”nin rəqibi 4 cavabsız qolla qələbə qazanıb. 8-ci dəqiqədə Lukiç avtoqola imza atıb. 59-cu dəqiqədə Skepoviç komandasının ikinci qolunu vurub. 72-ci dəqiqədə Yoyiç hesabı darmadağın həddinə çatıb. Ninkoviç isə 81-ci dəqiqədə yekun nəticəni müəyyənləşdirib. "Partizan" hazırda 30 xalla turnir cədvəlinə başçılıq edir.
Kazan “Rubin”i Rusiya Premyer Liqasının 14-cü turu çərçivəsində səfərdə “Mordovya”nın qonağı olub. Kurban Berdıyevin komandası 10-cu dəqiqədə Dyadyunun qolu sayəsində hesabı açıb. 48-ci dəqiqədə meydan sahibləri hesabı bərabərləşdiriblər. 75-ci dəqiqədə Dyadyun komandasının və özünün ikinci qoluna imza atıb. Rondon isə 90-cı dəqiqədə yekun nəticəni müəyyənləşdirib - 3:1. "Rubin" hazırda 24 xalla 7-ci sırada qərarlaşıb.
Milan “İnter”i isə A Seriyasının 11-ci turu çərçivəsində səfərdə “Juventus”la qarşılaşıb. Görüşdə hesabı turinlilər açıblar. 1-ci dəqiqədə Vidal fərqlənib. Amma Andre Stramaççoninin yetirmələri qalan dəqiqələrdə toparlanmağı və əzmkar qələbə qazanmağı bacarıblar. 59-cu dəqiqədə Milito penaltidən fərqlənib. O, 76-cı dəqiqədə özünün və komandasının ikinci qoluna imza atıb. Oyunda yekun nəticəni isə Palasio müəyyənləşdirib - 3:1. "İnter" bu qələbə sayəsində hazırda 11 oyuna 27 xalla 2-ci yerdə gedir.
