4 noyabr 2012 02:03
“Yığmaya dəvət aldığıma görə çox sevinirəm”
“Simurq”un kapitanı Rasim Ramaldanov klubun rəsmi saytına növbəti oyun və milliyə dəvət edilməsi haqqında fikirlərini bildirib. Azerisport.az xəbər verir ki, o, həmçinin cari mövsüm barəsində də fikirlərini bölüşüb.
- Rasim, ilk növbədə komandanın son vəziyyəti haqqında nə deyərdin? Son 3 oyunda 1 xal...
- Əvvəlcə onu deyim ki, bizim son 3 qarşılaşmamız hazırkı cari mövsümdə çempionluğa ən böyük namizədlər olan komandalarla olub. Biz də onlara qarşı qorxmadan, çəkinmədən çıxıb oynumuzu oynamışıq, sona qədər mübarizə aparmışıq. Ancaq çox təəssüf ki, bəxt amili bizdən yana olmayıb. Komandada heç bir problem yoxdu. Hər şey öz qaydasında davam edir. Geridə qalan oyunlardan dərs çıxarıb, növbəti turlara hazırlıqlarımızı davam etdiririk.
- Növbəti turda “Turan”ın qonağı olacaqsız. Rəqibi necə dəyərləndirərdin?
- Bizi qarşıda çox çətin oyun gözləyir. Rəqibimiz sona qədər vuruşan komandadır. Son oyunlarda da gözəl nəticələr əldə edərək, turnir cədvəlində irəliləyiblər. Ancaq buna baxmayaraq, Tovuzda meydana yalnız qələbə üçün çıxacağıq.
- Uzun müddətdir gözlənilən dəvət gəldi. Azərbaycan yığmasına dəvət olunmağın haqqında nə deyərdin?
- Bu dəvətə görə çox sevinirəm. Hər bir futbolçu kimi, mənim də əsas hədəflərimdən biri milli komandaya çağırılmaq idi. Çalışacam ki, özümü yaxşı tərəfdən göstərim, mənə olan inamı itirməyim. Bu dəvətə görə təşəkkürümü bildirirəm. İnşallah, şans verilsə, yığma komandanın heyətində qələbələr qazanmaq üçün əlimdən gələni edəcəyəm.
- Cari mövsümün gedişatı səni qane edirmi?
- Doğurdan bu mövsüm əvvəlki illərə nismətən çox ağır keçir. Çempionatda konkret autsayder yoxdu. Hər bir komanda istənilən rəqibə qalib gəlmək gücünə malikdir. Ancaq bu, Premyer Liqanı çox maraqlı edir. Oyunlara ancaq qələbə əzmiylə hazırlaşırıq. İnşallah biz də gözəl futbol və əla nəticə ilə ən yüksək yerlərdə özümüzə mövqe tutacağıq.
