7 noyabr 2012 13:08
Azərbaycan üçün son üç ilin ən pis göstəricisi
FİFA dünyanın futbol yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan yığması yeni açıqlanan siyahıda 12 pillə geriləyib.
Ötən ay 111-ci pillədə qərarlaşan Azərbaycan yığması FİFA-nın siyahısında xeyli geriləyərək 112-cü pilləyə enib. Hazırda millimizin aktivində 277 xal var. Halbuki, ötən ay xal sayımız 307 idi. Qeyd edək ki, bu, son üç ildə yığmamızın FİFA reytinqindəki ən pis göstəricisidi.
DÇ-2014-ün seçmə mərhələsində yığmamızın rəqiblərindən olan komandalar arasında yalnız Lüksemburqu qabaqlayırıq. Bu komanda ötən ayla müqayisədə 2 pillə geriləyib (144-cü yer; 179 xal). Şimali İrlandiya 17 pillə irəliləyib. Bir neçə gün sonra yığmamızı qəbul edəcək bu komanda hazırda 356 xalla 100-cüdü. Portuqaliya bir pillə geriləyib və indi 1178 xalla 4-cüdü. Rusiya 3 pillə irəli düşüb və 1084 xalla 9-cudu. İsrail də irəliləyib. Bu ölkənin millisi isə 452 xalla 78-ci yerdə gedir.
İlk onluğa gəlincə, İspaniya 1564 xalla zirvədəki yerini qoruyub. Almaniya da yerində sayıb və hazırda 1421 xalla ikinci yerdədi. Argentina 1349 xalla üçüncü pilləyə qalxıb. Portuqaliya isə 1 pillə geriləyib və hazırda 1178 xalla dördüncüdü. İtaliya (1169) 3 pillə irəliləyib və indi beşincidi. İngiltərə geriləyib (1167 xalla altıncı). Hollandiya da eyni aqibəti yaşayıb və 1128 xalla yeddincidi. Kolumbiya 1110 xalla səkkizinci sıraya qalxıb. Rusiya doqquzuncu (1084 xal), Xorvatiya (1078) onuncudu.
Növbəti reytinq siyahısı dekabrın 19-da açıqlanacaq.
