7 noyabr 2012 16:14
Aslan Kərimov: Neftçidən Rubinlə oyunda uğur gözləmək olar
Futbol üzrə Azərbaycan yığmasının sabiq kapitanı Aslan Kərimov “Neftçi”nin Avropa Liqasının qrup mərhələsi çərçivəsində Rusiya “Rubin”inə qarşı keçirəcəyi oyundan danışıb. Azerisport.az saytına müsahibəsində o, öncə bunları söyləyib:
“Bu matçda “Neftçi”dən daha yaxşı oyun gözləyirəm. Deməzdim ki, komandamız Kazanda pis oynamışdı. Sadəcə, hücumda bir qədər dişsiz görünürdülər. Amma Bakıdakı görüşdə daha yaxşı oyun gözləyə bilərk. Çünki Bakıda azarkeş dəstəyi də komandamızın yanında olacaq. Fikrimcə, ən azı heç-heçəyə ümid etmək olar”.
“Neftçi” Premyer Liqadakı son üç oyunundan ikisində məğlub olub. Amma Kərimov “Rubin”lə matçın fərqli olduğunu düşünür: “İstənilən halda Avropa Liqasının oyunları ilə Premyer Liqanın görüşləri bir-birindən fərqlənir. Bu turnirlərə yanaşma da fərqlidi. Avroliqa oyunlarında futbolçulara əlavə motivasiya da lazım deyil. Əgər bakılılar diqqətli, kompakt oyuna üstünlük versələr, yaxşı nəticə qazana bilərlər. Əlbəttə, səhvlər həmişə olur. Amma ümid edirəm ki, bu oyunda komandamız daha az səhv edən tərəf olacaq. Bilirik ki, “Neftçi” müdafiədən oynamır. Uşaqlar hücum etsələr, uğur gözləmək olar”.
U-16-nın baş məşqçisi “Neftçi”nin aparıcı futbolçularından Bahodir Nasimovla Cavid İmamverdiyevin yoxluğuna da toxunub: “Cavidin yoxluğu böyük itkidi. Bu, təəssüf doğurur. Eyni zamanda Bahodirin indi hücum xəttində yer alması heç də pis olmazdı. Təbii ki, bunu onun yaxşı formada olduğu dövrə əsasən deyirəm. Nikolas Kanales də pis hücumçu deyil. Amma Nasimovun da “Neftçi”də öz yeri var”.
Kərimov 16 yaşlılardan ibarət yığmamızın sükanı arxasına keçməsindən də danışıb: “Mən öncədən U-15-ə rəhbərlik edirdim. Amma uşaqların yaxşı artdı, digər yığmalara keçdilər. Prinsipcə, indi də elə həmin uşaqları çalışdırmalı olacağam. Lakin bu, heyətdə heç bir dəyişiklik olmayacağı anlamına gəlmir. Gələnlər də olacaq, gedənlər də. Qapımız hamının üzünə açıqdı. Həm də bizə indi daha çox futbolçu lazımdı ki, seleksiya zamanı ən yaxşıları seçməkdə çətinlik çəkməyək”.
Yığmamızın sabiq kapitanı Orxan Əliyevin “Porto”ya baxışa yollanmasından da danışıb: “Əliyev bu kluba keçsə, buna çox sevinərəm. Avropa klublarında azərbaycanlı futbolçular o qədər də yaxşı qəbul olunmur. Fikrimcə, getdikcə bizim futbolçulara marağın artması müsbət məqamdı. Hətta Orxanın “Porto”da baxışdan keçməsi də bizim futbolun reklamıdı”.
