10 noyabr 2012 13:27
“İlk qələbəmizi də Partizan ilə oyunda qazanacağıq”
Azərbaycan çempionu “Neftçi”nin müdafiəçisi İqor Mitreski UEFA Avropa Liqasının qrup mərhələsi çərçivəsində Rusiyanın “Rubin” klubuna qarşı keçirdikləri oyunu şərh edib. Azerisport.az saytına müsahibəsində, o, 0:1 hesabıyla uduzduqları qarşılaşma ilə bağlı öncə bunları dilə gətirib:
“Rubin”i qələbə münasibətilə təbrik edirəm. Məğlub olmağımıza baxmayaraq, biz heç də pis oynamadıq. Hamımız asan olmayacağını başa düşürdük. Çünki özümüzdən güclü rəqibə qarşı oynayırdıq. Biz öz oyunumuzu göstərə bildik. Rəqibə heç nədə uduzmadıq. Onların da qol epizodları oldu, bizim də. Sadəcə, onlar həmin epizodlardan birini qola çevirdikləri halda, biz bunu bacarmadıq”.
Mitreski Flavinyonun üçüncü dəqiqədə ələ düşən gözəl fürsətdən yararlanacağı halda hər şeyin fərqli bitəcəyini bildirir: “Belə oyunlarda ələ düşən hər şansdan yararlanmağa borclusan”.
Moskva “Spartak”ının keçmiş müdafiəçisi daha sonra bunları söyləyib: “Bəxt amili də bizim tərəfimizdə deyildi. Hesab edirəm ki, bizdə sadəcə bu çatışmırdı. Düzdü, biz çoxlu qol vəziyyəti yarada bilmədik. Amma arxada da oturmurduq. Futbol oynamağa çalışırdıq. Rəqibin yaxşı müdafiə olunduğunu da qeyd etmək lazımdı. Axı çox güclü komandaya qarşı oynayırdıq”.
Mitreski qarşıdakı hədəflərindən də danışıb: “Bizim nail olacağımız bəzi hədəflər hələ də qalmaqdadı. Qrup mərhələsində cəmi bir qol vurmuşuq, 1 xal qazanmışıq. İnd qalır ilk qələbəmizi rəsmiləşdirməyimiz. Bunu da “Partizan”la oyunda həyata keçirməyə çalışacağıq. Fikrimcə, sərgilədiyimiz oyun bunu gerçəkləşdirməyə imkan verir”.
