11 noyabr 2012 15:09
Mahmud Qurbanov: Onlar haqlıdırlar
Ötən gün “Gələcəyə Körpü” fan-klubunun təşəbbüsü ilə “Kəpəz” Peşəkar Futbol Klubunun üzvləri və azarkeşlər arasında görüş baş tutub. Azerisport.az xəbər verir ki, görüşdə komandanın baş məşqçisi Mahmud Qurbanov, kapitan Azər Məmmədov, Xəyal Zeynalov, Emin İmaməliyev, Armando Feutçin və Yuri Fomenko iştirak edib. Fan-klublardan isə “Kəpəz” və “Xəmsə” azarkeşləri tədbirə qatılıb.
Açılış nitqi ilə çıxış edən “Gələcəyə Körpü” fan-klubunun rəhbəri Mikayıl Əlizadə qonaqları salamlayıb. Əlizadə çempionatda çətin günlər keçirən kluba azarkeşlərin bu məqamda dəstək verməsinin vacibliyini deyib. “Kəpəz” klubunun mətbuat xidmətinin rəhbəri Məqsəd Rəhimov azarkeşlərlə komanda arasında tez-tez baş tutan belə görüşlərin əhəmiyyətindən bəhs edib. Mahmud Qurbanov isə görüşü ərsəyə gətirənlərə və dəstəyə görə fan-klublara öz minnətdarlığını çatdırıb.
“Xəmsə” fanklubunun rəhbəri Adil Məmmədov və “Kəpəz”in prezidenti Elmar Əliyev baş məşqçiyə və komandaya inandıqlarını bildiriblər. Futbolçular adından çıxış edən Azər Məmmədov böhranlı günlərə son qoymaq üçün səylə çalışdıqlarını söyləyib.
Görüşdən sonra Mahmud Qurbanov təəssüratlarını bölüşüb: “Səmərəli tədbir oldu. Fan-klublar dəvət etdilər, biz də onlarla görüşə böyük məmnuniyyətlə gəldik. Sağ olsunlar, turnir cədvəlində sonuncu pillədə olsaq da, komandaya dəstək nümayiş etdirirlər. Futbolçulara ruh verirlər. Onlara bunun üçün minnətdarıq. Azarkeşlərin təklif və iradlarını dinlədik. Fanatlar haqlıdılar. Nəticə istəyirlər. İnanın ki, uğurla çıxış etməkdə özümüz daha çox maraqlıyıq. Baş məşqçi olaraq görüşdən razı qaldım. Görüşü təşkil edənlərə sağ ol deyirəm”.
