13 noyabr 2012 21:44
Berti Foqts Belfastda ilk dəqiqələrdən kimlərə şans verəcək?
Futbol üzrə Azərbaycan yığmasının baş məşqçisi Berti Foqts DÇ-2014-ün seçmə mərhələsi çərçivəsində Şimali İrlandiyaya qarşı keçiriləcək oyunda hansı futbolçulara ilk dəqiqələrdən şans verəcəyinə böyük ölçüdə aydınlıq gətirib. Azerisport.az xəbər verir ki, almaniyalı mütəxəssis yalnız bir mövqe ilə bağlı tərəddüd edir.
Foqtsun qapını “Qəbələ”nin üzvü Anar Nəzirova tapşıracağı gözlənilsə də, o, fərqli qərar qəbul edib. Belə ki, yığmamızın çalışdırıcısı çətin səfər görüşündə debütant qapıçıya şans verməyə risk etməyib və qapını “Turan”lı Andrey Popoviçə həvalə etməyə hazırlaşır.
Müdafiə xəttinin mərkəzində Ruslan Abışovla Rasim Ramaldanov yer alacaq. Cinahlar isə Maksim Medvedevlə Əli Gökdəmirə tapşırılacaq.
Bundan əlavə Rahid Əmirquliyev, Cavid Hüseynov, Vüqar Nadirov, Cihan Özkara və Rauf Əliyevin də start heyətdə meydana çıxması gözlənilir.
Start heyətdə yer almalı olan digər futbolçunun kimliyi isə hələlik dəqiq bilinmir. Güman ki, bu, zədədən əziyyət çəkən Aleksandr Çertoqanov olacaq. Təbii ki, oyun saatına qədər tam hazır ola bilsə.
Qeyd edək ki, Şimali İrlandiya – Azərbaycan oyunu sabah Belfastdakı “Vindzor Park” stadionunda keçiriləcək və Bakı vaxtı ilə saat 23:45-də start götürəcək.
