16 noyabr 2012 19:15
Əfran İsmayılov Neftçi ilə danışıqları dayandırıb, Qarabağda qalmağa qərar verdi
Futbol üzrə Azərbaycan yığmasının yarımmüdafiəçisi Əfran İsmayılov “Neftçi”yə keçməkdən imtina edib. Azerisport.az xəbər verir ki, məhz bu kluba keçmək istəyi ilə əlaqədar “Qarabağ”dan da uzaqlaşdırılan gənc futbolçu yenidən keçmiş komandasında qalmağa qərar verib.
Qeyd edək ki, bir müddət öncə İsmayılov baş məşqçi Qurban Qurbanovla görüşərək qışda başqa kluba keçmək istəyini dilə gətirmişdi. Bunu eşidən Qurbanov onu komandanın məşqlərindən kənarlaşdırmışdı. Amma Əfran yeni klubu ilə razılığa gəlmədən bu “Qarabağ”dan ayrılmaq qərarına peşman olub və komandaya qayıtmağa qərar verib. Qurbanov və klub rəhbərliyi onun bu istəyini qəbul ediblər. Bunu saytımıza müsahibəsində Əfran özü də təsdiqləyib:
“Bəzi mətbuat orqanlarında mənim yalnız pulu düşündüyüm barədə yazılar xoşuma gəlmədi. Qurban Qurbanov digər komanda yoldaşlarım kimi, mənim üçün də az iş görməyib. Son dövrlər bu qərarım haqda çox düşündüm. Bu gün “Qarabağ”ın baş məşqçisi ilə görüşümdə qərarımdan çox təəssüfləndiyimi bildirdim və komandada qalmaq istədiyimi bildirdim. Sağ olsun ki, o, mənim doğma komandama qayıtmağıma razı oldu. “Qarabağ”da qalacağam. Bununla sübut etmək istəyirəm ki, pul mənim üçün əsas deyil”.
Qeyd edək ki, Əfran İsmayılovun “Qarabağ”la müqaviləsinin müddəti 2013-cü ilin mayında bitəcək.
