17 noyabr 2012 01:24
Abdullayevdən yığmamızın üzvlərinə sərt mesaj: Futbol kişi oyunudu!
“Düzünü deyim ki, yığmamızın oyununu o qədər də bəyənmədim. Amma nəticə özü qane edir. Hər halda oyundan öncə çox az adam yığmamızın Belfastda xal qazanacağına inanardı. Sərgilədiyimiz oyun isə çox pis təəssürat yaratdı. Çox bərbad oyun sərgilədik”.
Abdullayevin sözlərinə görə, yığmamız rəqibə qol vurmaq üçün çox imkan yaradırdı: “Əlbəttə, biz istərdik ki, komandamız nəticəni həm də gözəl oyunla qazansın. Özünüz də görürdünüz ki, rəqib nə qədər qol imkanı yaradırdı. Bəlkə heç portuqaliyalılar bizimlə oyunda o qədər qol epizodu qaçırmadılar. Rəqibə həmin oyundakından dördqat artıq qol imkanı yaratdıq. Müdafiə xəttinin oyunundan çox narazı qaldım. Arxa xətt demək olar ki, köməksiz idi. Müdafiəçilər heç mübarizə aparmırdılar. Rəqibin hər hücumunda futbolçular qapıya doğru asanca zərbə endirə bilirdilər. Hücumda da problemlər var idi. Sadəcə, Rauf Əliyevin zərbəsi əla alındı. Həqiqətən yaxşı qol idi. Özü də o, bu qolu işlək olmayan ayağı ilə vurdu. Yarımmüdafiə xətti də müdafiə və hücuma lazım olan dəstəyi nümayiş etdirmirdi”.
AZAL-ın sabiq çalışdırıcısı futbolçularımızın vaxt öldürməyə hesablanan hərəkətlərini də pisləyib: “Futbol kişi oyunudu! Onu layiqli şəkildə oynamaq lazımdı, uduzanda da layiqli şəkildə uduzmaq lazımdı. Bizə də uşaqlıqda necə vaxt öldürmək lazım olduğunu öyrədiblər. Amma daha bir neçə dəqiqə qazonda uzanıb qalmaqla yox. Vaxt öldürmək üçün o qədər yollar var ki: tempi aşağı sal, künclərə qaç, top saxla. Variantlar çoxdu. Biz hətta qələbə də qazansaydıq, buna layiq deyildik. Futbolçularımız özlərini belə aparmamalıdılar. Bu, həm də yeni gələn nəsil üçün pis nümunədi. Meydanda bu qədər uzanıb vaxt aparmaq düzgün deyil”.
Abdullayev sonda öz məşqçilik karyerasına, işsiz qalmasına da toxunub: “Karyeramı Azərbaycanda davam etdirmək istəmirəm. Hətta klublarımızdan gələn dəvətlərə baxmaq belə istəmirəm. Ölkə xaricində çalışmaq istəyirəm. Ümumiyyətlə, son vaxtlar futbolumuzu başa düşə bilmirəm. Nə baş verdiyini başa düşmək olmur. Güclü, peşəkar klub uşaq məşqçisini gətirib baş məşqçi qoyur. Yaxud Novruz Əzimovun yerinə gətirilən Bojidar Bandoviç olsun. O, Əzimovdan sonra nə iş görüb ki? Mənə təkliflər var. Amma gördüklərim məni qane etmir. Səhvlərdən nəticə çıxarmaq lazımdı”.
