17 noyabr 2012 14:15
Sərnişin avtobusu Şəfa stadionuna girdi (FOTO)
Bakıda sərnişin avtobus idarəetməni itirərək "Şəfa" stadionuna girib. Azerisport.az xəbər verir ki, bu barədə şahidlər məlumat veriblər.
Nizami rayon Polis İdarəsindən məlumatı təsdiqləyiblər və bildiriblər ki, hadisə nəticəsində xəsarət alanlar var. Lakin təfərrüatlar barədə məlumat verilməyib.
Məlumata görə, qəzanı törədən 11 saylı sərnişin avtobusu olub. İlkin ehtimala görə, yol qəzasına yüksək sürət səbəb olub. Avtobus "Şəfa" stadionuna girməzdən öncə stadionun yanındakı işıqforu qırıb və yaxınlıqdakı "Toyoto-Prado" markalı avtomobili əzib.
Bakı Şəhər Təcili və Təxirəsalınmaz Tibbi Yardım Stansiyasından bildirilib ki, ilkin məlumata görə, qəza zamanı 6 nəfər xəsarət alıb.
Trend-in hadisə yerində olan əməkdaşının verdiyi məlumata görə, xəsarət alanlardan biri "Toyoto-Prado" markalı avtomobilin sürücüsü olub. Bakı Şəhər Təcili və Təxirəsalınmaz Tibbi Yardım Stansiyasının əməkdaşları artıq xəsarət alanları xəstəxanalara yerləşdiriblər.
Yol-hərəkəti üzrə inspektor, polis kapitanı Müştəba Həmidovun verdiyi məlumata görə, sərnişin avtobusu idarəetməni itirərək öncə "Qazel" markalı avtomobili vurub. Sonra işıqforu qıraraq "Şəfa" stadionunun qarşısında dayanan "Toyoto-Prado" markalı avtomobili əzərək stadiona girib.
Bakı Şəhər Təcili və Təxirəsalınmaz Tibbi Yardım Stansiyasından bildiriblər ki, yol qəzası zamanı xəsarət alanların sayı dəqiqləşdirilib. Belə ki, qəza zamanı 8 nəfər xəsarət alıb və onlar 3 saylı Sabunçu Klinik Xəstəxanasına yerləşdirilib. Onların vəziyyəti qənaətbəxşdi. Xəstələrə ilkin tibbi yardım göstəriləndən sonra evə buraxılıblar.
