23 noyabr 2012 02:14
Vladimir Vermezoviç: Biz Bakıdakı oyunun nəticəsindən razı qalmalıyıq
Serbiyanın “Partizan” klubunun baş məşqçisi Vladimir Vermezoviç Avropa Liqasının qrup mərhələsi çərçivəsində Azərbaycan çempionu “Neftçi”yə qarşı keçirdikləri oyunu şərh edib. Azerisport.az xəbər verir ki, o, 1:1 hesablı heç-heçənin ardından bunları dilə gətirib:
“Gərgin oyun oldu. Hər iki komanda qələbə qazanmaq istəyirdi. Birinci hissədə qol buraxandan sonra biz daha fəal oynamağa başladıq. Aleksandr Mitroviçin meydandan qovulmasının səbəbini bilmirəm. Həmin anı görə bilmədim. Fikrimcə, oyunun nəticəsindən razı olmalıyıq. Çünki matçın sonlarında 10 nəfərlə mübarizə aparmalı olduq. Komandamdan yaxşı oyun intizamı gördüm. Müdafiədə yaxşı oynadıq. Təəssüf ki, qol buraxdıq. Həmin qolu buraxmaya da bilərdik. “Neftçi”nin Belqradda, yoxsa Bakıda güclü oyun sərgilədiyini demək çətindi. Çünki bunlar iki fərqli oyun idi. Bu dəfəki “Neftçi”nin daha açıq futbol sərgilədiyini deyə bilərəm. Amma həm orda, həm də burda problemlə üzləşdik. Rəqibin heyətində çoxlu yaxşı futbolçular var. Məsələn, Flavinyo çox səviyyəli oyunçudu”.
