24 noyabr 2012 00:05
“Azlıqda qalmasaydıq, biz Neftçiyə qalib də gələ bilərdik”
Serbiyanın “Partizan” klubunun yarımmüdafiəçisi Milan Smilyaniç Avropa Liqasının qrup mərhələsi çərçivəsində Azərbaycan çempionu “Neftçi”yə qarşı keçirdikləri oyunu şərh edib. Azerisport.az xəbər verir ki, o, 1:1 hesablı heç-heçənin ardından bunları dilə gətirib:
“Crvena Zvezda” ilə oyunda olduğu kimi, “Neftçi” ilə görüşdə də oyunumuz fasilədən sonra dəyişdi. Bundan əvvəlki oyunda fasilədən sonra pis çıxış etməklə yadda qalmışdıqsa, bu dəfə yaxşı oynamağı bacardıq. Heç birinci hissədə də pis oynadığımızı düşünmürəm. Amma 10-cu dəqiqədə buraxdığımız erkən qol oyunumuza təsirsiz ötüşmədi. Həm də “Neftçi” birinci hissədə daha yaxşı oynadı. Elə bir təəssürat yaranmışdı ki, futbolçularımızın hamısı matçın başa çatmasını gözləyir. Amma buna baxmayaraq, ikinci hissəyə daha yaxşı başlamağa nail olduq. Ardıcıl qol epizodları yaratmağa başladıq və nəticədə hesabı bərabərləşdirdik. Lakin qırmızı vərəqə planlarımızı korladı. Baxmayaraq ki, “Neftçi” bundan istifadə edə bilmədi. Azlıqda qalmağımıza çox məyus oldum. Fikrimcə, bu olmasaydı, biz qələbə də qazana bilərdik. Aleksandr Mitroviç ağıllı oğlandı. Düzdü, gəncdi, təcrübəsizdi. Hər halda o, səhvini başa düşür və etiraf edir. Əsas odu ki, bu qırmızı vərəqə nəticəyə təsir göstərmədi. Əminəm ki, Mitroviçi həmin epizodda təxribata çəkdilər. O, təkcə “Partizan”ın yox, Serbiya futbolunun gələcəyidi”.
