25 noyabr 2012 00:27
AFFA bir referini qeyri-müəyyən müddətə hakimlikdən uzaqlaşırır
AFFA Hakimlər Komitəsi Fərid Məmmədovu qeyri-müəyyən müddətə hakimlikdən kənarlaşdırmaqla bağlı qərar qəbul edib. Azerisport.az xəbər verir ki, buna səbəb sözügedən referinin Azərbaycan Birinci Divizionunun son turunda “Neftçala” ilə “Şuşa” arasındakı oyunda qərəzli idarəçiliyi göstərilir.
Bu oyundakı mübahisəli vəziyyətlərə təkrar baxış keçirən qurum Məmmədovun kobud səhvlərə yol verdiyini aşkarlayıb. Bu üzdən də bu hakimin cəzalandırılmasına qərar verilib. Amma hələlik bu barədə rəsmi qərar açıqlanmır. Bu, güman ki, qarşıdakı həftənin ilk günlərində ictimaiyyətə də bəyan olunacaq.
Xatırladaq ki, bu qarşılaşmada hesabı 17-ci dəqiqədə “Şuşa” açıb. Amma Birinci Divizionun lideri olan “Neftçala” 51 və 66-cı dəqiqələrdə iki qol vuraraq, əzmkar qələbə qazanıb.
Sonda onu da bildirək ki, Fərid Məmmədov Premyer Liqa oyunlarına da təyinat alır. Məsələn, Premyer Liqanın ötən turunda “Neftçi”nin “Sumqayıt”ı 8:1 hesabıyla məğlub etdiyi oyunda meydan sahiblərinin baş məşqçisi Böyükağa Hacıyevin tribunaya göndərilməsinə məhz dördüncü hakim olan Məmmədov səbəb olmuşdu.
