26 noyabr 2012 11:18
Elvin Məmmədov: 10 000-ci qolun müəllifi olduğumu bilmirdim
“Bakı”nın kapitanı Elvin Məmmədov Topaz Premyer Liqasının 14-cü turunun “Neftçi” ilə oyunundan sonra azerisport.az saytının suallarını cavablandırıb. “Zolaqlılar”ın yarımmüdafiəçisi 1:2 hesablı məğlubiyyətdən sonra bunları dilə gətirib:
“Hesabı aça bildik, amma üstünlüyümüzü qoruya bilmədik. Son dəqiqələrdə qol buraxmaq həmişə ağırdı. Azlıqda qalmağımız oyunumuza dərhal təsir göstərdi. Hər halda bu futboldu, belə şeylər olur”.
“Hesabı aça bildik, amma üstünlüyümüzü qoruya bilmədik. Son dəqiqələrdə qol buraxmaq həmişə ağırdı. Azlıqda qalmağımız oyunumuza dərhal təsir göstərdi. Hər halda bu futboldu, belə şeylər olur”.
O, baş hakim Elçin Məmmədovun idarəçiliyindən də danışıb: “Hakimlikdən danışacağam, başlayacaqlar məni tənqid etməyə. Əgər kimsə düzgün olmayan qərarın qəbul olunduğunu görürsə, bunu deməlidi. Hər şey ədalətli olmalıdı. Bu gün də bəzi epizodlar var idi ki, hakim lazımsız yerə qayda pozuntusu qeydə alırdı”.
Məmmədovun fikrincə, referi ümumiyyətlə Novruz Məmmədovu meydandan qovmamalıydı: “Bəli, o, kobud oynamışdı. Amma hakim də səhvə yol verdi. Bizdə futbolçu dəyişikliyi baş verməmiş hakim oyunun bərpasına icazə verdi. Belədə Novruz da dərhal epizoda müdaxilə etməyə tələsdi. Hakim buna imkan verməməliydi. Bəlkə də mən səhv edirəm. Lakin düşünürəm ki, futbolçunun mövqeyinə çəkilməsini gözləmək lazımdı ki, oyunu bərpa edəsən. Burda isə anlaşılmazlıq baş verdi. Mən hakimə yanaşıb ona səhvini başa salmağa çalışdım. Ümid edirəm ki, müvafiq qurumlar həmin epizoda baxıb lazım olan qərarı çıxaracaqlar”.
Maraq üçün qeyd edək ki, Elvin Məmmədov bu oyunda həm də Azərbaycan çempionatlarında vurulmuş 10 000-ci qolun müəllifi oldu. Amma o, özü bundan xəbərsiz olduğunu deyir: “Əlbəttə, belə tarixi qolun müəllifi olmaq xoşdu. Amma mən heç 10 000-ci qolun müəllifi olduğumu bilmirdim”.
“Bakı”nın futbolçusu “Sumqayıt”la qarşıdakı oyundan da danışıb: “Bakı” böyük klubdu. Biz nəyin bahasına olur-olsun bu vəziyyətdən çıxmalıyıq. Amma bu, heç də asan olmayacaq. Çalışacağıq ki, “Sumqayıt”la kubok oyununda uğur qazanaq”.
