27 noyabr 2012 01:23
Julius Vobay: Baş hakimin qərarını ədalətli sayıram
“Neftçi”nin yarımmüdafiəçisi Julius Vobay Topaz Premyer Liqasının 14-cü turunun “Bakı” ilə oyunundan (2:1) sonra azerisport.az saytının suallarını cavablandırıb. Təcrübəli futbolçu öncə bunları dilə gətirib:
“Oyun bizim üçün yaxşı alındı. Bu üç xal bizə çox lazım idi. Şadam ki, qarşıya qoyulan vəzifəyə çata bildik”.
“Oyun bizim üçün yaxşı alındı. Bu üç xal bizə çox lazım idi. Şadam ki, qarşıya qoyulan vəzifəyə çata bildik”.
İki gün öncə Avropa Liqasında Serbiya “Partizan”ı ilə çətin oyuna çıxan “ağ-qaralar”ın futbolçusu ağır qrafikdən də şikayətlənib: “Təbii ki, belə qrafikdə oynamaq heç də asan deyil. Amma biz özümüzü yaxşı tərəfdən göstərməyə çalışırıq. “Bakı” ilə oyunda da məhz bunun sayəsində istəyimizə nail olduq. Lakin buna çox çətinliklə nail olduq”.
Vobay “Bakı” ilə oyundakı hakimlikdən də danışıb: “Fikrimcə, baş hakim mənə qarşı qayda pozuntusuna yol verən Novruz Məmmədova qırmızı vərəqə göstərməklə düzgün qərar qəbul etdi. Çünki həmin futbolçu mənə qarşı çox kobud oynadı. Ona görə də hakimin qərarını ədalətli sayıram”.
Julius komandasının qarşıdakı “Tərəqqi” ilə kubok oyunundan da danışıb: “Etiraf edim ki, bu rəqib haqda çox şey bilmirəm. Amma inanmıram ki, onlarla oyunumuz asan keçsin. Növbəti mərhələyə vəsiqə qazanmaq üçün əlimizdən gələni etməliyik. Bilirik ki, rəqibimiz Birinci Divizion təmsilçisidi. Amma işimizin asan olacağını düşünmürəm”.
Ehtimal var ki, “Neftçi” məhz ağır qrafik səbəbindən kubok oyununa ehtiyatda qalan futbolçularla çıxsın: “Bunu dəqiq deyə bilmərəm. Yaxşısı budu bu sualı baş məşqçi Böyükağa Hacıyevə ünvanlayasınız”.
