27 noyabr 2012 02:30
Bakı İbrahim Karqbonu əsas komandadan uzaqlaşdırır
Xəbər verdiyimiz kimi, “Bakı”nın futbolçusu İbrahim Karqbonun Topaz Premyer Liqasının 14-cü turunun “Neftçi” ilə oyununda bilərəkdən zəif oynadığına dair şübhələr yaranıb. Azerisport.az xəbər verir ki, buna dair şübhələrin olmasını qarşılaşmanın baş hakimi Elçin Məmmədov da saytımıza müsahibəsində iddia etmişdi.
Daim sabit çıxışı ilə seçilən 30 yaşlı syerra-leonelinin məhz flaqman qarşısında kobud səhvlərə yol verməsi birmənalı qarşılanmır. Onun xüsusilə ilk dəqiqələrdə “Neftçi”yə fərqlənmək imkanı yaratması, amma rəqibin bu imkandan yararlana bilməməsi, “Bakı” hesabı açdıqdan az sonra Karqbonun penaltiyə səbəbkar olması və nəhayət, uzatma dəqiqələrində Flavinyonun qoluna əngəl olmaması şübhəli məqamlar kimi hallandırılır. Hətta onun “Neftçi”nin heyətində çıxış edən həmyerlisi və Syerra-Leone yığmasındakı komanda yoldaşı Julius Vobayla gizli sövdələşməyə getmə ehtimalı araşdırılır.
Hər ehtimala qarşı bu oyundakı zəif çıxışına görə Vobayın əvəzedici komandaya göndərilməsi gözlənilir. Lakin onunla bağlı şübhələr doğrulacağı halda, daha sərt tədbirlərin görülməsi də istisna olunmur.
