27 noyabr 2012 15:00
Denizlisporun vitse-kapitanı seçilən Rail Məlikova yeni azərbaycanlı futbolçu qoşula bilər
Türkiyənin “Denizlispor” klubunun baş meneceri və vitse-prezidenti Azərbaycana gəlib. Azerisport.az xəbər verir ki, onların Bakıya səfəri işgüzar xarakter daşıyır.
Məsələ burasındadı ki, Türkiyə klubunun rəsmiləri ölkəmizdə bəzi futbolçulara baxış keçirəcəklər. Onların 5-6 oyunçu seçməsi gözlənilir. Bu məqsədlə “Denizlispor” nümayəndələri sabah keçiriləcək Azərbaycan kubokunun 1/8 final mərhələsinin qarşılaşmalarını izləyəcəklər.
Maraq üçün qeyd edək ki, “Denizlispor”da artıq bir azərbaycanlı futbolçu çıxış edir. Bu, yığmamızın müdafiəçisi Rail Məlikovdu. Qardaş ölkəyə gedən gündən daim əsas heyətdə meydana çıxan və əvəzlənmədən çıxış edən “Neftçi”nin sabiq üzvü ona olan etimadı artıqlaması ilə doğrultmaqdadı. Məhz Railin bu inamlı çıxışı klub rəhbərliyinin azərbaycanlı futbolçulara marağını artırıb.
Yeri gəlmişkən, daha bir maraqlı faktı diqqətinizə çatdıraq. Belə ki, Rail Məlikov artıq “Denizlispor”un vitse-kapitanı seçilib. Bu haqda komandadaxili iclasda razılıq əldə olunub.
