29 noyabr 2012 15:16
Orxan Əliyev Portonun təklifindən imtina etdi
Futbol üzrə Azərbaycanın U-19 yığmasının və “Sumqayıt”ın forvardı Orxan Əliyev Portuqaliyanın “Porto” klubuna keçməkdən imtina edib. Azerisport.az xəbər verir ki, buna səbəb onun sözügedən klubun yeniyetmələrdən ibarət komandasında çıxış etmək istəməməsidi.
Eyni zamanda “Porto B” komandasının məşqçiləri də futbolçumuza lazımi diqqəti göstərməyiblər. Hansı ki, bu komanda Portuqaliyanın birinci divizionunda çıxış edir.
Bu məlumatı “Porto”nun skautlar departamentinin direktoru Joao Afonso da təsdiqləyib: “Bizim məşqçilər korpusumuz təxminən üç həftə ərzində bu futbolçunu baxışdan keçirdi. Biz onda potensial gördük. Lakin bu futbolçunun hazırki səviyyəsi “Porto B” üçün uyğun deyil. Buna görə də Orxana klubun 19 yaşadək futbolçulardan ibarət komandasında çıxış etməyi təklif etdik. Lakin o, bundan imtina etdi”.
Afonso onun imtinasına da münasibət bildirib: “Onun bu təklifimizdən imtinasını normal qəbul edirik. Orxanın bu qərarına hörmətlə yanaşırıq. Lakin başqa çıxış yolu yox idi. Mümkündü ki, bir il sonra biz yenidən bu məsələyə qayıdaq”.
