1 dekabr 2012 19:35
Kəpəz qərb derbisinə hazırdı
“Kəpəz” “Turan”la oyunun hazırlıqlarını yekunlaşdırıb. Azerisport.az xəbər verir ki, komandanın son məşqi 1 saatdan bir qədər çox davam edib və yüngül xarakter daşıyıb.
Məşqə Andrey Kolesnikovun rəhbərliyi altında qaçış-isinmə hərəkətləri ilə başlayan komanda üzvləri sonradan topla çalışmalara keçiblər. Yarım saata yaxın davam edən bu çalışmalar boyu baş məşqçi Mahmud Qurbanov fərqli tərzdə hərəkətlərlə, futbolçuların oyun zamanı ötürmələrdə bir-birlərini daha yaxşı başa düşməsi üçün öz göstərişlərini verib. Hazırlıq zamanı bəzi oyunçular istisna olmaqla klub tam heyətlə məşq edib. Belə ki, əzələsində dartılma olan qapıçı Xəyal Zeynalovla qasıq nahiyəsində ağrılardan əziyyət çəkən gənc yarımmüdafiəçi Elvin Həsənəliyev həkim nəzarətində fərdi olaraq məşq ediblər. Zeynalovdan fərqli, Həsənəliyev hazırlığın əvvəlində komandaya qoşulsa da, ikitərəfli oyunda futbolçu yenidən fərdi halda hazırlaşıb.
