2 dekabr 2012 01:04
15-ci tura 15-ci qələbə üçün
Topaz Premyer Liqasının 15-ci turunda “Xəzər Lənkəran” 3 oyunluq səfərlərə son qoyacaq. Azerisport.az xəbər verir ki, çempionatın son 2 matçında “Bakı” və “Kəpəz”in, ölkə kubokunda “Turan”ın qonağı olduqdan sonra doğma meydana qayıdan komanda AZAL-ı qəbul edəcək.
Bu qarşılaşma rəqiblər arasında 22-ci duel olacaq. İndiyədək komandalar 17 dəfə çempionat, 4 dəfə kubok çərçivəsində görüşüblər. Bu matçlarda 14 dəfə qalib gələn “Xəzər Lənkəran” XV turun oyununda 15-ci qələbəni qazanmağa çalışacaq. Cəmi 3 dəfə məğlub olan XL 4 dəfə heç-heçə ilə kifayətlənib. 21 matçda 28 qol vuran cənublu futbolçular cəmi 10 dəfə qapısında qol görüb.
Çempionatdakı oyunlara gəlinсə, AZAL-ın 2005/06 mövsümündə həmin vaxt güclülər dəstəsi adlanan Premyer Liqada keçirdiyi ilk matç məhz “Xəzər Lənkəran”a qarşı olub. Həmin vaxt 2:0 hesabı ilə qalib gələn XL ümumilikdə 12 dəfə rəqibini məğlub edib, 3 heç-heçə edib və yalnız 2 dəfə uduzub. Premyer Liqadakı qarşılaşmalarda top fərqi 23:7-dir.
2007/08 və 2009/10 mövsümlərində isə AZAL-la bu komandanın yolları kubokda kəsişib. Hər 2 halda mərhələ keçən “Xəzər Lənkəran” ev matçlarında qələbə qazanıb. Səfərdə isə heç-heçə və məğlubiyyət qeydə alınıb. Bu görüşlərdə top fərqi cənubluların xeyrinə - 5-3-dür.
Bakılılarla son oyunlar isə “Xəzər Lənkəran”ın istisnasız qələbələri ilə başa çatır. Ardıcıl 4 qələbə qazanan XL bu qarşılaşmalarda qol da buraxmayıb. Bu 4 görüşün 2-də böyük hesaba sevinən cənublu futbolçular 9 dəfə rəqib qapısına yol tapıb.
