6 dekabr 2012 15:24
“Bunun üçün maksimum güc sərf etməli olacağıq”
“Qarabağ” sabah Premyer Liqanın 16-cı turunda “Kəpəz”i qəbul edəcək. Azerisport.az xəbər verir ki, sonuncu pillədə olmasına baxmayaraq əksər oyunlarda sona qədər mübarizə aparan Gəncə təmsilçisi bu dəfə də ağdamlılara başağrısı olmağa çalışacaq.
Artıq cari mövsüm 2 dəfə qarşılaşan tərəflərin mücadiləsi gərginliyi ilə yadda qalıb. Premyer Liqa çərçivəsində qolsuzluğa razılaşan tərəflərin 1 həftə qabaq kubokda baş tutan görüşündə “Qarabağ” əlavə hissədə vurduğu qollarla turu keçən tərəf olmuşdu.
“Qarabağ”ın yarımmüdafiəçisi Namiq Yusifov “Kəpəz”lə oyunu dəyərləndirib: “Öncə qeyd edim ki, bizi çətin oyun gözləyir. Gəncəlilərlə hər 2 oyunumuz oduqca çətin alınıb. Bu dəfə bizdən xal almağa çalışacaqlar. Amma biz də meydana ancaq 3 xal üçün çıxacağıq. Son zamanlar yaxşı forma yığmağa başlamışıq. Bu oyunda qələbə qazanıb, liderlər qrupunda qalmağı planlaşdırırıq. Amma bunun üçün maksimum güc sərf etməli olacağıq. Çalışacağıq ki, qış fasiləsinə nikbin əhval-ruhiyyədə yollanaq. Qışa kimi “Bakı” və “Xəzər Lənkəran” kimi 2 güclü rəqiblə qarşılaşacağıq. Amma buna qədər “Kəpəz”i fikirləşməliyik. Gəncə klubuyla son 2 oyunumuz bizi buna məcbur edir. Amma biz istənilən halda qələbə qazanmalıyıq. Məsələni əlavə vaxta aparmalı deyilik”.
