7 dekabr 2012 03:31
“Milanda heç-heçə edəcəyimizə inanırdım, amma 2:2-ni düşünmürdüm”
“Neftçi”nin kapitanı Rəşad Sadiqov UEFA Avropa Liqasının qrup mərhələsi çərçivəsində İtaliyanın “İnter” klubuna qarşı keçirdikləri oyunu şərh edib. Azerisport.az xəbər verir ki, o, Milanda baş tutan və 2:2 hesabıyla başa çatan qarşılaşma ilə bağlı bunları dilə gətirib:
“Bu gün biz həqiqətən də yaxşı futbol oynadıq. Bunu özünüz də gördünüz. Milan klubundan səfərdə bir xal almağı bacardıq. Bakıya heç-heçə ilə qayıtmağımızla qürur duyuruq”.
Rəqib qapısına vurulan ilk qolun müəllifi uğur qazanacaqlarına öncədən də inandıqlarını bəyan edib: “Düzünü deyim ki, mən burda heç-heçə edəcəyimizə inanırdım. Lakin 2:2 hesablı heç-heçəni ağlımdan keçirmirdim. Sadəcə, yaxşı nəticə ilə dönəcəyimizi hiss edirdi. Şadam ki, belə bir oyunda qol da vura bildim. “Cüzeppe Meatsa”da qol vurmaq hər gün nəsib olmur. Biz vaxtilə düşünə də bilməzdik ki, qrup mərhələsinə çıxarıq, belə klublarla oynayarıq. Amma gördüyünüz kimi, belə bir şans qazandıq”.
Kapitan qrup mərhələsindəki çıxışlarına da qiymət verib: “Fikrimcə, ilk dəfə üçün 3 xal əla nəticədi. Təəssüf ki, bütün qarşılaşmalarda öz oyunumuzu göstərə bilmədik. Amma bu dəfə komanda oyunu göstərdik. Belə komandalarla oyunlar, qazanılan uğurlar futbolçuya istər-istəməz əlavə inam qazandırır”.
