7 dekabr 2012 15:23
Topaz Premyer Liqası, 16-cı tur: Aslan Kərimovun proqnozu
Futbol üzrə Azərbaycanın U-16 yığmasının baş məşqçisi Aslan Kərimov Topaz Premyer Liqasının 16-cı turunun oyunları ilə bağlı proqnozlarını açıqlayıb. Azerisport.az həmin proqnozlarla sizi də tanış edir.
Qarabağ – Kəpəz
Ağdam təmsilçisi üçün “Neftçi” üzərindəki qələbədən sonra bu oyunda xal itirmək olmaz. Həm də “Kəpəz”in indi ciddi problemləri var. Ona görə də ağdamlıların qələbə qazanacaqlarını düşünürəm.
Sumqayıt – Qəbələ
Son turlarda “Qəbələ” yaxşı çıxış etsə də, “Bakı” ilə ev oyununda məğlub oldu. İndi Ramiz Məmmədovun yetirmələri növbəti dəfə xal itirmək istəməyəcəklər. “Sumqayıt”ın isə itiriləsi heç nəyi yoxdu. Komanda son pillələrdə gedir. “Qəbələ” üç xala sevinən tərəf olacaq.
İnter – AZAL
“İnter”in bu mövsüm çempion olmaq üçün əla şansı var. Buna görə də onlara hər oyunda qələbə qazanmaq vacibdi. Maraqlı oyun izləyəcəyik. Amma mən yenə də “İnter”in qələbəsini görürəm.
Simurq – Xəzər Lənkəran
“Xəzər Lənkəran”da işlər hazırda heç də yaxşı getmir. Heyətində əla futbolçular cəmləşsə də, bu komanda hələ öz oyununu tapa bilmir. Yeni baş məşqçinin öz ideyalarını aşılaması üçün zaman lazımdı. “Simurq” isə yeni mövsümdə əla təsir bağışlayır. Əgər XL fərdi planda güclüdüsə, “Simurq” komanda oyunu ilə diqqət çəkir. Fikrimcə, Zaqatalada heç-heçə olacaq.
Turan – Bakı
Malraqlı oyun olacaq. Tovuz stadionunun qazonu pis gündədi. Bu, komandaların şanslarını bərabərləşdirir. Amma uğurun “Bakı”nın tərəfində olacağını düşünürəm. Son dövrlər bu komanda öz oyununu tapmağa başlayıb. Asan olmayaq, lakin bakılılar qazanacaq.
Neftçi – Rəvan
“Neftçi”nin avrokuboklardakı oyunu da göstərdi ki, komanda yaxşı formadadı. Bu mövsüm “Rəvan” onlara qalib gəlib. Amma bu dəfə “Neftçi”nin üstün olacağını düşünürəm. Bu komanda revanş alacaq.
