10 dekabr 2012 02:24
Messi Müllerin rekodunu qırdı, Falkao şou göstərdi
İspaniya La Liqasının son turu "Barcelona"nın hücumçusu Lionel Messi, eləcə də “Atletico”nun forvardı Radamel Falkao üçün əlamətdar olub. Azerisport.az xəbər verir ki, hər iki futbolçu fərqli rekordlara imza atıb.
Messi Almaniya millisinin əfsanəvi futbolçusu Herd Müllerin rekordunu qırmaqla diqqət mərkəzinə düşüb. 25 yaşlı futbolçu bu rekorda "Betis"lə oyunda vurduğu iki qolla imza atıb. 2012-ci ildə meydana çıxdığı 66 oyunda 86 qol vuran Messi Mülleri geridə qoyub. Müller 1972-ci ildə keçirdiyi 60 oyunda 85 dəfə rəqib qapılarına yol tapmışdı. Lakin Müllerin rekordunu təzələyən argentinalı oyunçu bir il ərzində ən çox qol vuran futbolçu adına yiyələnib.
Qeyd edək ki, Messi bu rekordla da kifayətlənməyib. Belə ki, "Betis"lə görüşün ilk hissəsində dubla imza atmaqla qollarının sayını 192-yə çatdıran Messi "Barcelona"nın heyətində ən çox qol vuran futbolçu olub.
“Atletico” - “Deportivo” oyununda isə azarkeşlər Falkao-şou izləyiblər. O, komandasının 6:0 hesablı qələbəsi ilə başa çatan görüşdə beş qola imza atıb ki, bu da cari çempionatda rekord göstəricisidi.
Falkao bu qolları sayəsində həmçinin İspaniya La Liqasının bombardilik yarışında "Real"ın hücumçusu Ronaldonu geridə qoyaraq ikinci pilləyə yüksəlib. O, qollarının sayını 16-ya çatdırıb. Birinci yeri isə ehtiyatında 21 qolu olan "Barcelona"nın hücumçusu Lionel Messi tutur.
