11 dekabr 2012 15:04
Vaqif Cavadov: Qarabağın şikayətlənməyə haqqı yoxdu
“Qarabağ” “Bakı”yla oyunun hazırlıqlarını davam etdirir. Azerisport.az xəbər verir ki, Premyer Liqanın 17-ci turunda paytaxtın eyniadlı komandasının qonağı olacaq “Qarabağ” məşqlərini Suraxanı qəsəbə stadionunda edir.
“Qarabağ” “zolaqlılar”la oyuna tam heyətlə hazırlaşır ki, bu da sevindirici xəbərdi. Son oyunlarda qazanılan nəticələr komandaya nikbinlik gətirib. “Kəpəz”lə baş tutan son oyunda qol vuran və bir penalti qazanan Vaqif Cavadov yaxşı idman formasıyla diqqəti cəlb edir. 23 yaşlı forvard klub saytına verdiyi açıqlamasında “Bakı”yla oyuna dəyərləndirib:
“Son oyunlarda “Bakı” yaxşı təsir bağışlayır. Hiss olunur ki, yeni gələn baş məşqçi öz sistemini otuzdurmağa çalışır. Bu qazanılan son nəticələrdə də özünü göstərir. Amma biz də pis vəziyyətdə deyilik. Hazırda ilk pilləni bölüşdürürük. Qazanacağımız 3 xal bizə çox lazımdı. Qış fasiləsinə nikbin yollanmaq istəyirik. “Bakı”nın meydançası yaxşı vəziyyətdədir. Bu da hər 2 tərəfin yaxşı futbol göstərməsinə imkan yaradacaq. “Bakı”yla oyunlarımız hər zaman gərgin alınır. Ötən mövsüm həm çempionatda, həm də kubokda “zolaqlı”lara məğlub olmaqla avrokuboklardan kənarda qaldıq. Elə ilk dövrədə ki oyun da maraqlı keçmişdi. Ümumiyyətlə, cari birincilikdə hər qələbənin qiyməti çox böyükdü. Qazanılacaq 1 xalın belə əhəmiyyəti hiss olunur. Belə baxanda vəziyyətimiz pis deyil. Düzdü, bəzi oyunlara baxanda fikirləşirsən ki, daha çox xal toplaya bilərdik. Amma bütün komandaların gücləndiyini və hamının xal itirdiyini görəndə şikayətlənməyə haqqımızın olmadığını görürəm. Qışa kimi “Xəzər Lənkəran”la da vacib görüşə çıxacağıq. Amma indi ancaq “Bakı”yla oyuna köklənmişik”.
