“Uğursuzluq olsa, yığmanın məşqçilər korpusu yüz faiz dəyişdiriləcək”

Azərbaycan Futzal Federasiyasının prezidenti Zaur Axundov azerisport.az saytının suallarını cavablandırıb.

 

- Yəqin ki, Rusiya Futzal Federasiyasının prezidenti Emil Əliyevin MDB ölkələri arasında çempionat keçirmək haqda açıqlamasından xəbəriniz var...

- Bəli. Mən onunla bu haqda on gün əvvəl söhbət etmişəm. Bilirəm ki, təşkilatçılar Rusiya və Azərbaycan ilə yanaşı Ukrayna, Belarus, Qazaxıstan və Latviya klublarını da görmək istəyirlər. Amma bunlar hələ ki, sözdədi. Rəsmi açıqlama olandan sonra, biz bunu AFFA ilə də müzakirə edəcəyik.

 

- Bu ideya sizə görə nə dərəcədə məqsədəuyğundu?
- Düzünü deyim ki, çox yaxşı ideyadı. Məsələn, hokkey üzrə MDB və Baltikyanı ölkələrinin çempionatı var. Əgər futzalda da belə bir turnir təşkil olunsa, böyük faydası olacaq.

 

- Yəqin ki, son illərdə Azərbaycan çempionatında özünə layiq rəqib tapa bilməyən “Araz” üçün bu turnir göydəndüşmə olacaq...

- Bəli, bu turnir “Araz”ı daha da gücləndirə bilər. Amma bildiyimə görə, çempionatda hər ölkədən iki klubun iştirakı nəzərdə tutulub. Əgər altı ölkə qoşulsa, bu, o deməkdi ki, 12 klubdan ibarət yaxşı çempionat keçirmək olar. “Araz”la yanaşı bu çempionatda kubokun qalibi və ya çempionatın gümüş mükafatçısı çıxış edə bilər. İstənilən halda belə bir turnir keçirilsə, Azərbaycan mütləq orda iştirak edəcək.

 

- AÇ-2014-ün seçmə mərhələsinin püşkü barədə nə deyə bilərsiz?
- Bizə Slovakiya ilə Bosniya və Herseqovina rəqib olub. Daha bir rəqibimiz isə sonra məlum olacaq. Bizim hədəfimiz qrupda birinci olmaqdı. Çünki Avropa çempionatına birbaşa vəsiqə qazanmaq istəyirik. Bu alınmasa, onda ikinci yerlə pley-off oynamaq məcburiyyətində qalacağıq.

 

- Sizcə, birinci yeri tutmaq nə dərəcədə çətin olacaq?
- Rəqiblərimiz güclüdü. Amma reytinqə görə biz hamısından üstünük. Hesab edirəm ki, millimiz birinci olmağa borcludu. Komandanın qarşısına məhz bu vəzifə qoyulub. Bu yaxınlarda toplantımız oldu. Orda da qeyd olundu ki, uğursuzluq olan halda komandanın heyəti və məşqçilər korpusu yüz faiz dəyişdiriləcək.