12 dekabr 2012 14:36
Viktor Mendi: Simurqun XL ilə heç-heçəsi bizi çox sevindirdi
“Qəbələ”nin hücumçusu Viktor Mendi Topaz Premyer Liqasının 17-ci turunun “Simurq”la oyunu öncəsi fikirlərini açıqlayıb. Azerisport.az saytına müsahibəsində o, öncə bunları dilə gətirib:
“Biz “Simurq”a qalib gələ bilərik. Doğma azarkeşlərimiz önündə “Bakı”ya məğlubiyyəti unutdurmaq üçün buna borcluyuq. Həm də üç xal bizim üçün çox vacibdi”.
“Biz “Simurq”a qalib gələ bilərik. Doğma azarkeşlərimiz önündə “Bakı”ya məğlubiyyəti unutdurmaq üçün buna borcluyuq. Həm də üç xal bizim üçün çox vacibdi”.
Mendi bəyan edib ki, son turda “Simurq”la “Xəzər Lənkəran” arasındakı oyunun heç-heçə bitməsi onu çox sevindirib: “Bu oyunu izləyirdim. Heç-heçə bizi çox sevindirdi. Birincisi, cənublular bizə yaxınlaşa bilmədilər. İkinsi isə “Simurq” bizdən uzaqlaşa bilmədi. İndi bizə yalnız qarşıdakı oyunlarda xal itirməmək qalır. Liderlərdən cəmi iki xal geri qalırıq. İstənilən qələbə bizi üst sıraya çıxara bilər”.
Təcrübəli forvard “Sumqayıt”a qarşı keçirdikləri son oyunu da xatırlayıb: “Sumqayıt”la oyunda biz meydana yalnız qələbə üçün çıxmışdıq. Bizim üçün bir və ya 3 qolla qalib gəlməyin fərqi yox idi. Əsas o idi ki, 3 xal qazanaq. Çünki “Bakı”ya ev məğlubiyyəti bizə çox pis təsir etmişdi”.
Seneqallı hücumçu bu oyunda vurduğu qoldan dərhal sonra əvəzlənməsinə də münasibət bildirib: “Hələ qola qədər ayağımda bir qədər ağrı hiss etdim. Bu üzdən də əvəzlənmək məcburiyyətində qaldım. Müayinədən keçmişəm və hər şeyin qaydasında olduğunu deyiblər. “Simurq”la oyunda iştirak etmək şansım əllinin əlliyədi. Hər ehtimala qarşı ehtiyatlı olmağım lazımdı. Yüngül zədələr adətən daha ciddi fəsadlarla nəticələnir”.
“Qəbələ” bu ilin son oyununu Tovuzda “Turan”a qarşı keçirəcək. Mendi bu görüşdən də danışıb: “Zaqatala klubu ilə görüşdən sonra “Turan”la qarşılaşmalıyıq. Biz tovuzlulardan qisas almağa çalışacağıq. Bu komanda ilə ev oyununda xalsız qalmağımız kifayət qədər gözlənilməz olmuşdu. Bu komandanı səfərdə məğlub edib, fasiləyə yaxşı əhval-ruhiyyədə yollanmağa çalışacağıq”.
