Yığmamızın baş məşqçisi: Azərbaycanda yeni çempionat təşkil olunmalıdı

Futzal üzrə Azərbaycan yığmasının və “Araz” klubunun baş məşqçisi Joze Alesio azerisport.az saytının suallarını cavablandırıb. Braziliyalı mütəxəssis öncə MDB ölkələrinin aparıcı klubları arasında yeni çempionatın keçirilməsi ideyasına münasibət bildirib:

“Mən Emil Əliyevin (Rusiya Futzal Federasiyasının azərbaycanlı prezidentini nəzərdə tutur – azerisport.az) bu təşəbbüsü barədə oxumuşam. “Araz” məmnuniyyətlə belə bir turnirdə iştirak edərdi. Lakin hər şey klub rəhbərliyinin mövqeyindən asılıdı. Eyni zamanda təşkilatçıların istəyi də dəqiq məlum deyil. Çünki onların bu ideyasının söz olaraq qalacağını, yaxud əməli addımlar atılacağını hələ heç kim bilmir”.

 

Braziliyalı mütəxəssis böyük futboldan fərqli olaraq, Azərbaycan futzalının MDB məkanında aparıcı rol oynadığını bildirib: “Araz” UEFA Kubokunda dördlər finalına çıxmış komandadı. Azərbaycan klubu keçmiş SSRİ məkanında hazırda ən güclülərdəndi. Yaxşı heyətimiz, oyunçularımız var. Lakin heyətimiz mütəmadi olaraq dəyişir. Bu da başadüşüləndi. Bizim çempionat o qədər də güclülərdən sayılmır. Futbolçular isə həmişə ən güclü birinciliklərdə öz sözlərini demək istəyirlər. MDB çempionatının təşkili bu baxımdan da bizim işimizə yaraya bilər. Çempionatda rəqabətin aşağı olması komandaya pis təsir göstərir. Fikrimcə, Azərbaycanı MDB çempionatında “Neftçi” də təmsil edə bilər. Eyni zamanda “Ekol”u da qeyd etmək lazımdı”.

 

Alesio bu çempionatda iştirak edəcəkləri halda komandasının daha da güclənəcəyini istisna etmir: “Belə olsa, təbii ki, “Araz”ın avrokuboklardakı nəticələri də yaxşılaşa bilər”.

 

“Araz”ın baş məşqçisi Azərbaycanda əvəzedicilərin çempionatının keçirilməsinin vacibliyini də vurğulayıb: “Bizə yeni oyunçular lazımdı. Onları üzə çıxarmaq üçün isə belə bir çempionatın da təşkili vacibdi. Mən bu barədə federasiya prezidenti Zaur Axundovla da danışmışam. O, bir çox məsələlərdə mənimlə razıdı. Məncə, əvəzedicilərin çempionatı bizə yeni istedadları tapıb üzə çıxarmağa imkan yaradacaq”.