“Bizim bir hədəfimiz var – ardıcıl üçüncü dəfə çempion olmaq”

“Neftçi”nin yarımmüdafiəçisi Rəşad Sadiqov Topaz Premyer Liqasının 1-ci turundan təxirə salınmış “Bakı” ilə oyun öncəsi azerisport.az saytının suallarını cavablandırıb.

- “Xəzər Lənkəran”a məğlubiyyətdən sonra özünüzə gələ bilmisiz?
- Mən deməzdim ki, bu məğlubiyyət bizim üçün güclü zərbə oldu. Sadəcə, üç xal itirdik. Turnir cədvəli baxımından bu, elə də ciddi ikti sayılmamalıdı. Yeganə məyus edən məqam odu ki, prinsipial rəqibimizə məğlub olduq.

 

- Sabah sizi daha bir prinsipial rəqiblə - “Bakı”yla duel gözləyir...

- Həqiqətən də “Bakı” ilə “Neftçi” meydana çıxandan sonra hər şey unudulur. Düşmən kimi oynayırıq (gülür). Bu dəfə uduzmaq istəmirik.

 

- Artıq qalan oyunlarınızda qələbə qazansanız da, vahid lider ola bilmirsiz...

- Bəli, “Xəzər Lənkəran”a məğlubiyyətdən sonra biz təxirə salınan görüşlərdə qələbə qazanmaqla yalnız “İnter”lə xallarımızın sayını bərabərləşdirə bilərik. Gördüyünüz kimi, bu mövsüm sensasiyalar çoxdu. Hər həftə gözlənilməz nəticələr qeydə alınır.

 

- “Bakı”, AZAL və “İnter”lə baş tutacaq həmin təxirə salınmış görüşlərdən nə gözləyirsiz?
- Bu üç oyunda qələbə qazanmaq hazırda əsas hədəfimizdi. Maksimum xal toplamalıyıq ki, qış fasiləsinə yaxşı əhval-ruhiyyədə yollanaq. Düzdü, hər üçündə qələbə qazanmaq çətin olacaq. Çünki bütün rəqiblərimiz qarşılarına böyük hədəflər qoyublar. Amma bütün rəqiblərimizi məğlub edəcək gücdəyik.

 

- Yəqin ki, Avropa Liqası başa çatdığı üçün çempionat oyunlarına köklənməyiniz asan olacaq...

- Şübhəsiz. İndi bizim bir hədəfimiz var – ardıcıl üçüncü dəfə çempion olmaq!