Xəzər Lənkəran üçün Premyer Liqadakı 250-ci matçda “Böyük qələbə”

Topaz Premyer Liqasının XVII turu “Xəzər Lənkəran” üçün əlamətdar hadisə ilə tarixə düşdü. Azerisport.az xəbər verir ki, “Neftçi”ni qəbul edən komanda Azərbaycan çempionatında yubiley – 250-ci matçını keçirdi.

 

2004/05 mövsümündə ölkə çempionatında debüt edən “Xəzər Lənkəran” tarixinin ilk rəsmi matçını 2004-cü il avqustun 7-də “Turan”a qarşı keçirib.

 

“Neftçi” ilə “Böyük oyun”a kimi 249 matça çıxan XL azarkeşləri önündə qeyd etdiyi yubileyində qələbə qazandı – 2:1. Tarixi baxımdan 6-cı əlamətdar qarşılaşmaya çıxan “Xəzər Lənkəran” bu matçlarda “səfərdə heç-heçə, evdə qələbə” prinsipinə davam etdirdi. 100-cü və 200-cü oyunlarını evdə qələbə ilə qeyd edən komanda 250-ci matçda da 3 xala sevindi.

 

 1         2004/05           07.08.2004      Turan (Tovuz) s           1:1

50        2005/06           17.02.2006      Bakı (Bakı)      s           1:1

100      2007/08           23.02.2008      Masallı (Masallı)          e          4:1

150      2009/10           06.12.2009      İnter (Bakı)     s           1:1

200      2010/11           13.05.2011      Bakı (Bakı)      e          2:0

250      2012/13           14.12.2012      Neftçi (Bakı)   e          2:1

 

 

Qeyd edək ki, 250 oyunda 133 qələbə qazanan “Xəzər Lənkəran” 72 heç-heçə edib və 45 dəfə uduzub. Bu matçlardakı top fərqi 382-172-dir ki, 2004/05 mövsümünün “Şəfa” ilə oyunundakı texniki qələbə (3:0) top fərqinə salınmayıb. Komanda 250 qarşılaşmadan 124-nü evdə, 125-ni səfərdə, 1-ni isə neytral meydanda keçirib. Cənublular 8 il ərzində 26 rəqiblə üz-üzə gəlib.