Onuncu və sonuncu səfər

Bu həftə Topaz Premyer Liqasında XVIII turun oyunları keçiriləcək. Azerisport.az xəbər verir ki, 2012-ci ilin son turunda “Qəbələ” “Turan”ın qonağı olacaq.

 

Tovuzda keçiriləcək görüş Ramiz Məmmədovun yetirmələri üçün ilin son oyunu, həm də son səfəri olacaq.

 

Dekabrın 20-dəki görüş rəqiblərin yubiley – 20-ci qarşılaşması olacaq. Əvvəlki 19 matçda “Qəbələ”nin üstünlüyü aşkardır. 12 qələbəsi olan komanda 3 dəfə heç-heçə edib və cəmi 4 dəfə uduzub. Bu matçlardan 15-i Premyer Liqaya təsadüf edib. Çempionatda 10 qələbəsi olan “Qəbələ” 2 dəfə heç-heçə ilə kifayətlənib və cəmi 3 dəfə xalsız qalıb. 15 qol vuran komanda cəmi 8 top buraxıb. Kubokda isə Qəbələ təmsilçisinin 2, tovuzluların 1 qələbəsi var. Daha 1 görüş heç-heçə bitib. Buradakı top fərqi də Ramiz Məmmədovun yetirmələrinin xeyrinədir – 4:3.

İlin sonuncu səfəri “Turan”la rəqib meydanındakı 10-cu matçdır. 5 dəfə Tovuzdan qələbə ilə qayıdan qonaqlar 2 dəfə heç-heçə ilə kifayətlənib və yalnız 2 dəfə məğlub olub. Səfərdəki yubiley matçınadək qonaqlar 9, meydan sahibləri 6 dəfə fərqlənib. Lakin “Turan” 2008-ci il noyabrın 5-də evdə uduzduğu (1:2) kubok matçından sonra “Qəbələ”yə evdə qol vura bilmir. Belə ki qonaqlar son 5 səfərdə qapısının toxunulmazlığını saxlaya bilib.