“Bakının ilk altılıqda yer alacağına şübhə etmirəm”

“Bakı”nın yarımmüdafiəçisi Deyvidas Çesnauski Topaz Premyer Liqasının 1-ci turundan təxirə salınmış “Neftçi” ilə oyun öncəsi azerisport.az saytının suallarını cavablandırıb.

 

- “Bakı”nın ilk altılığa düşmək üçün sadəcə yeddi oyunu qalıb. Sizcə, bu oyunlarda istəyinizə çata biləcəksiz?
- Hazırda biz çox ağır qrafik keçiririk. Bu ilin sonuna kimi “Neftçi” və “İnter”lə görüşlərimiz var. Bu oyunlar çox şeyə aydınlıq gətirə bilər. Xal toplamalıyıq. İstənilən halda “Bakı”nın ilk altılıqda yer alacağına şübhə etmirəm.

 

- “Neftçi” ilə bu gün baş tutacaq görüşdən nə gözləyirsiz?
- Nə demək olar? Ciddi rəqibdi. Amma buna baxmayaraq, qələbə qazanmaq lazımdı. Üç xal bizə çox lazımdı.

 

- Amma buna “Qarabağ”la son oyunda nail ola bilmədiniz...

- “Qarabağ” mənə görə Azərbaycanın ən güclü klubudu. Təbii ki, “Bakı”dan sonra. Yaxşı, sabit və hətta maraqlı komandadı. Fikrimcə, biz onlara qarşı pis oynamadıq. Sadəcə, həlledici zərbələrimiz alınmırdı. Əks halda daha yaxşısına nail ola bilərdik.

 

- “Bakı” bu mövsüm ağdamlılara heç bir oyunda qalib gələ bilmədi...

- Buna görə rəqibin də çıxışını qeyd etmək lazımdı. Amma biz də bu mövsüm əsas favoritlərə uduzmamışıq. Sadəcə, “Neftçi”yə uduzmuşuq. Ümid edirəm ki, qarşıdakı oyunda qisas ala biləcəyik.

 

- Qələbələrinizin də sayı çox azdı...

- Biz bu mövsüm çox tez-tez heç-heçə edirik. Bu göstəriciyə görə hamıdan öndə olmağımız göz qabağındadı.

 

- Son dövrlər oyun baxımından artırdığınız hiss olunsa da, yenə nəticə yoxdu...

- Bəli, hazırda mövsümün əvvəli ilə müqayisədə daha yaxşı oynayırıq. Biz təkcə qol vura bilmirik.

 

- Bəs bütün bu çatışmazlıqları aradan qaldırmaq üçün nə lazımdı?
- Bizə yaxşı hücumçu çatmır ki, yaratdığımız epizodları dəyərləndirsin. Parks kimi hücumçumuz artıq xeyli müddətdi zədə səbəbindən bizə kömək edə bilmir.

 

- Özünüz də son dövrlər meydanda tez-tez görünməyə başlamısız...

- Yeni baş məşqçi gəlmişdi. Həm də mən ilk günlərdə yaxşı formada deyildm. İndi hər şey dəyişib.