Rahid Əmirquliyev: Bizə ancaq qələbə lazımdı

“Xəzər Lənkəran”ın kapitanı Rahid Əmirquliyev Topaz Premyer Liqasının 18-ci turunun “Qarabağ”la oyunu öncəsi azerisport.az saytının suallarını cavablandırıb.

 

- Komandanız niyə həmişə “Neftçi”yə qarşı oynadığı kimi mübarizə aparmır?
- Yəqin ki, bu oyunda motivasiya daha yüksək idi. Çünki biz vacib oyuna çıxmışdıq. Bu görüşə dönüş nöqtəsi kimi baxırdıq. Prinsipial rəqibimizi məğlub etmək istəyirdik.

 

- Onda belə çıxır ki, sizin çempion olmağınız üçün bütün rəqiblərinizin belə prinsipial olması lazımdı?
- (gülür) Digər klubları da hesabdan silmək olmaz.

 

- “Xəzər Lənkəran” ilk altılıqdan kənar qala bilər. Bununla bağlı qorxunuz var?
- Ümid edirəm ki, bu, müvəqqətidi. Biz tezliklə ilk altılıqda yer alacağıq. Çempionluq uğrunda mübarizə aparmaq heç də asan deyil. Bu mövsüm böyük rəqabət var.

 

- İlin son oyununda “Qarabağ”la üz-üzə gələcəksiz. Bu komandaya qarşı necə oynayacaqsız?
- Bu oyun da bizim üçün vacibdi. Çox istəyirik ki, qələbə qazanaq və mövsümün qalan hissəsinə yaxşı əhval-ruhiyyədə hazırlaşaq. Elə oynayıb-oynamayacağımızı bilmirəm. Amma motivasiya yenə yüksək olacaq. Bizə ancaq qələbə lazımdı. Məğlubiyyət və ya heç-heçə bizi qətiyyən qane etmir.

 

- Bu komandaya qarşı müdafiədən oynayacasız?
- Böyük ehtimalla açıq futbol olacaq. Çünki “Qarabağ” da bizim kimi qələbə qazanmaq istəyəcək.

 

- Son qələbəyə rəğmən, komandanızın çıxışı o qədər də uğurlu deyil...

- Vəziyyət getdikcə yaxşılaşır. Məsələn, “Neftçi” ilə oyunda tribunalar demək olar ki, dolmuşdu.

 

- Amma “Böyük oyun”larda adətən tribunalar tam dolu olurdu...

- Nəticələrimiz yaxşılaşsa, azarkeşlər də tribunalara qayıdacaqlar.