“Neftçi ilə oyunda biz iki xal itirdik”

“Bakı”nın baş məşqçisi Bojidar Bandoviç Topaz Premyer Liqasının 1-ci turundan təxirə salınmış “Neftçi” ilə oyundan (1:1) sonra azerisport.az saytının suallarını cavablandırıb.

- “Neftçi” ilə oyun haqda nə deyə bilərsiz?
- Biz oyunun böyük hissəsini “Neftçi”dən daha yaxşı keçirdik. Bu, daha çox ikinci hissəyə təsadüf etdi. Meydanda bircə komanda var idi – “Bakı”. “Neftçi” güclü olsa da, biz qələbə qazanmalıydıq. Çox təəssüf ki, yenə qapımıza penalti təyin olunması nəticəsində qol buraxdıq.

 

- “Neftçi”nin belə zəif oynayacağını gözləyirdiniz?
- Oyuna qədər rəqibin necə oynayacağı mənə maraqlı deyildi. Çünki həmişə yaxşı oyunu öz yetirmələrimdən gözləyirəm. Mənə elə gəlir ki, oyundan öncə məşq etmədən meydana çıxmaq çox çətindi.

- Komandanın oyundan öncə xeyli müddət tıxacda qalması oyununuza çoxmu təsir etdi?
- Bu, bizim oyunun əvvəlində erkən qol buraxmağımızda da özünü göstərdi. Amma şadam ki, yetirmələrim son zamanlar artırmağa başlayıblar. Şəhriyar Əliyevi, Elvin Məmmədovu, Nurlan Novruzovu xüsusi qeyd etmək istərdim.

 

- Amma komanda hazırda rekorda sayda heç-heçə ilə ilk altılıqdan kənardadı...

- Sizinlə razılaşmalıyam. Yenə heç-heçə oynamağa davam etsək, çətin ki, ilk altılığa düşə bilək. Amma “Neftçi” ilə oyunda biz qələbəyə layiq idik. Yenə iki xal itirdik. Lakin mən komandama inanıram. Biz son zamanlarda “Neftçi”dən başqa heç bir iddialı rəqibimizə uduzmamışıq.

 

- “İnter”lə oyun haqda nə deyə bilərsiz?
- Bizi möhkəm komanda ilə oyun gözləyir. Bir çox komponentlərdə güclüdülər. Bizə çox çətin olacaq. Amma bizim bu komanda ilə layiqli mübarizə aparmaq üçün hazırlaşmağa vaxtımız var.

 

- Qələbə qazana biləcəksiz?
- Biz hər oyuna qələbə qazanmaq üçün çıxırıq. Amma bu, həmişə alınmır. Qarşıdakı oyun bizim üçün çox vacibdi. Üç xal qazanmaq üçün oynayacağıq.