Azərbaycan yığması FİFA reytinqində irəlilədi

FİFA dünyanın futbol yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan yığması yeni açıqlanan siyahıda 5 pillə irəliləyib.

 

Ötən ay 123-cü pillədə qərarlaşan Azərbaycan yığması FİFA-nın siyahısında irəliləyərək 118-ci pilləyə qalxıb. Hazırda millimizin aktivində 277 xal var.

 

DÇ-2014-ün seçmə mərhələsində yığmamızın rəqiblərindən olan komandalar arasında yalnız Lüksemburqu qabaqlayırıq. Bu komanda ötən ayla müqayisədə 4 pillə geriləyib (148-ci yer; 172 xal). Şimali İrlandiya isə 4 pillə irəliləyib. İrlandlar hazırda 367 xalla 96-cıdılar. Portuqaliya üç pillə geriləyib və indi 1144 xalla 7-cidi. Rusiya 1070 xalla 9-cu pillədəki yerində qalıb. İsrail də yerində sayıb. Bu ölkənin millisi 454 xalla 78-ci yerdə gedir.

 

İlk onluğa gəlincə, İspaniya 1606 xalla zirvədəki yerini qoruyub. Almaniya da yerində sayıb və hazırda 1437 xalla ikinci yerdədi. Argentina 1290 xalla üçüncü pillədə gedir. İtaliya 1165 xalla dördüncü yerə çıxıb. Üç pillə irəliləyən Kolumbiya hazırda 1164 xalla beşincidi. 1151 xala malik İngiltərə altıncı pillədəki yerini qoruyub. Portuqaliya isə 3 pillə geriləyib və hazırda 1144 xalla yeddincidi. Hollandiya da bir pillə geriləyib və indi səkkizincidi – 1124 xal. Rusiya (1070) doqquzuncu, Xorvatiya (1064) onuncudu.

Növbəti reytinq siyahısı yanvar ayında açıqlanacaq.