“Bakının səhvi mövsümün əvvəlində çoxlu xal itirməsi oldu”

“Bakı”nın hücumçusu Maris Verpakovski Topaz Premyer Liqasının 18-ci turunun “İnter”lə oyunu öncəsi azerisport.az saytının suallarını cavablandırıb.

 

- “Bakı”nı üç oyundu məğlub edə bilmədiyi “İnter”lə sınaq gözləyir...

- Həm bu uğursuz seriya, həm də turnir vəziyyətimiz bizi qələbə qazanmağa məcbur edir. Əgər biz ilk altılığa düşmək istəyiriksə, mütləq qalib gəlməliyik. Güclü rəqibə qarşı oynayacağıq. Özü də onların daha yaxşı çıxış etdiyi öz meydanlarında. Onlar yaxşı müdafiə xəttinə malikdilər və təsadüfi hallarda qol buraxırlar.

 

- 16 oyuna cəmi 6 qol buraxan komandaya qarşı oynamaq hücumçu üçün nə deməkdi?
- Çətin olacaq. Bunun üçün bir hücumçunun yox, bütün komandanın çalışması lazımdı. Rəqib müdafiəsindəki boşluqları tapmağımız, istifadə etməyimiz lazımdı.

 

- “Neftçi” ilə son oyunda iki yaxşı qol epizodu yaxalasanız da, istifadə edə bilmədiniz...

- Onlardan yalnız biri yüz faizli qol epizodu idi. Digəri o qədər də real qol vəziyyəti deyildi. Təəssüf ki, heç birindən yararlana bilmədim. Qol vəziyyətləri yaratmağımız yaxşıdı. “Bakı” tədricən öz oyununu tapır. Bu, çox vacibdi.

 

- Siz razısız ki, hər tur “Bakı” ilk altılığa düşmək şanslarını bir az da azaldır?
- Təəssüf ki, belədi. Bizim əsas səhvimiz onda oldu ki, mövsümün əvvəlində çoxlu səhvə yol verdik. İndi məhz həmin xalların çatışmazlığı hiss olunur. Özü də həmin xalları favorit olmayan komandalarla görüşlərdə itirdik. Lakin yenə də hər şey itirilməyib. Komanda artıq özünü daha yaxşı hiss edir. Hələ “Turan”la da bir oyunumuz ehtiyatdadı.

 

- Bəs siz niyə qol vura bilmirsiz?
- Ola bilər ki, bu meydana o qədər də çox çıxmamağımla bağlıdı. “Neftçi”yə qədər kubok oyununda oynadım və qol vurdum. Mən sadəcə öz şansımı gözləyirəm.

 

- “Bakı”ya heç də əvvəlki Verpakovski gəlmədi. Bununla razısız?
- Bəli. Azərbaycanda öz keyfiyyətlərimi aça bilmədim. Amma səbəbini bilmirəm. Hamı kimi məşq edirdim. Çox ümid edirəm ki, özümü göstərmək üçün hələ şansım olacaq.