Nikolas Kanales: Bunu ilk dəfə eşidəndə zarafat olduğunu düşündüm

Sabah Topaz Premyer Liqasında “İnter”lə “Neftçi” arasında ilin son oyunu baş tutacaq. Azerisport.az xəbər verir ki, hər iki komandanın futbolçuları artıq bu oyuna kökləniblər.

Sabah meydana çıxacaq bəzi futbolçular bunun əvəzində öz ölkəsində, doğmaları ilə birgə Milad bayramını qeyd etməyi daha çox istərdi. Belələrindən biri də “Neftçi”nin hücumçusu Nikolas Kanalesdi. Çilili forvard ölkəsindən olan jurnalistlərlə söhbətində də bəyan edib ki, dekabrın 25-də oyun keçirmələrinə çox təəccüblənib:

“Mən dekabrın 25-də oyun keçirəcəyimizi eşidəndə, öncə buna inanmadım. Hətta elə düşünürdüm ki, bu, zarafatdı. Amma sonradan məlum oldu ki, bu, qətiyyən zarafat deyil. Milad günündə oynamalı olacağıq. Lakin sonradan başa düşdüm ki, mən müsəlman ölkəsində yaşayıram və onlarda həmin tarixdə bayram olmur”.

 

Kanales komandada onun kimi eyni vəziyyətdə olan daha bir neçə futbolçunun olduğunu da bəyan edib: “İlk dəfədi ki, Milad bayramını iş rejimində keçirəcəm. Amma belə vəziyyətdə olan tək mən deyiləm. Komandada daha bir neçə braziliyalı futbolçu da var ki, bayramı mənim kimi oteldə qarşılamalı olacaq”.

 

Nikolas hətta özünə yolka qurmadığını da bildirib: “Eybi yoxdu. Əgər yaxınlarımlabirgə deyiləmsə, bayram keçirməyin də mənası yoxdu. İdeyaya görə mən ailəmlə bir süfrə arxasında oturmalı idim. Lakin hazırda Çilidən çox uzaqdayam”.