Azerisport.com 2012-ci ilin ən yaxşılarını müəyyənləşdirdi

Azerisport.com Azərbaycan idmanında 2012-ci ilin ən yaxşılarını müəyyənləşdirib. Xeyli müddətdi saytımızda aparılan sorğuda qalib adını qazananlarla sizi də tanış edirik.

İlin ən yaxşı idmançısı adını Toğrul Əsgərov qazanıb. Sərbəst güləş üzrə olimpiya çempionu adını qazanan Əsgərova respondentlərin 64 faizi (254 səs) səs verib.

 

İlin ən yaxşı qadın idmançısı isə Natali Pronina seçilib. Paralampiadada həm çempion olan, həm də dörd dəfə gümüş medal qazanan üzgüçümüzə 191 səs verilib (50 faiz).

 

2012-ci ilin ən yaxşı məşqçisi Saypulla Absaidov olub. Sərbəst güləş üzrə yığmamızın məşqçisi 34 faizlik səs çoxluğu ilə (99 səs) qalib adını qazanıb.

Ən yaxşı komanda ünvanını basketbol üzrə Azərbaycan yığması qazanıb. AÇ-nin seçmə mərhələsində üçüncü olan yığmamıza 93 səs verilib (33 faiz).

 

İlin ən yaxşı futbolçusu adını Kamran Ağayev qazanıb. Xeyli müddətdi yaşıl meydandan kənarda qalan və “Xəzər Lənkəran”a məxsus qapıçıya 152 səs verilib (26 faiz).

 

Ən yaxşı futbol klubu Avropa Liqasında tarix yazan “Neftçi” olub. “Ağ-qaralar” 79 faizlik (404 səs) səs çoxluğu ilə qalib olublar.

Ən yaxşı futbol məşqçisi də məhz “Neftçi”nin çalışdırıcısı Böyükağa Hacıyev olub - 338 səs (84 faiz).

 

İlin ən yaxşı federasiyası isə AFFA olub - 434 səs (64 faiz).