Mila: Azərbaycanda ilimə yarım milyon dollar qazana bilərəm

Polşanın “Slensk” klubunun kapitanı Sebastyan Mila Azərbaycandan aldığı cəlbedici təkliflə bağlı fikirlərini açıqlayıb. Azerisport.az xəbər verir ki, o, bunları dilə gətirib:

“Mənim bu ölkəyə keçmək variantım inandırıcıdı. Agentimin dediyinə görə, çox ciddi təklif var. Azərbaycanlılar məni öz komandalarında görmək istəyirlər. Artıq maliyyə şərtlərini də açıqlayıblar. Azərbaycanda ilimə yarım milyon dollar qazana bilərəm. Amma hələ bu varianta baxmamışam. Çünki “Slensk”in yeni müqavilə təklifini gözləyirəm. Hər şeyə ondan sonra qərar verəcəm”.

 

Yarımmüdafiəçi Bakıya son səfərini də xatırlayıb. Hansı ki, həmin vaxt Polşa yığması DÇ-2006-nın seçmə mərhələsi çərçivəsində Azərbaycan millisinin qonağı olmuşdu: “O vaxt mən əsas yığmada oynayırdım. Yadıma gəlir ki, Bakıda çox isti idi. Amma buna baxmayaraq, biz 3:0 hesabıyla qalib gəldik”.

“Slensk”in kapitanı onu da bildirib ki, Azərbaycan klubuna keçidi baş tuta bilər: “Hər şey mümkündü. Məni görmək istədikləri yerdə oynamaq istərdim. Ola bilər ki, bu, elə Azərbaycan olsun. Heç nə istisna deyil”.

Qeyd edək ki, Polşa mətbuatı onunla “Neftçi”nin maraqlandığını iddia edir.