“Məni Azərbaycanda daha çox insanların futbolla maraqlandıqları halda stadiona gəlməməsi təəccübləndirdi”

“Simurq”un yarımmüdafiəçisi Marçin Burhard azerisport.az saytına müsahibəsində mövsümün geridə qalan dövrünü dəyərləndirib.

 

- Mövsümün geridə qalan dövrünü komandanız üçün necə dəyərləndirirsiz?
- Fikrimcə, heç kim “Simurq”un ili turnir cədvəlinin ilk pillələrində bitirəcəyini gözləmirdi. Amma biz buna nail olduq. Etiraf etməliyəm ki, buna çox çətinliklə nail olduq. Elə oyunlar da  oldu ki, bizdə heç də hər şey yaxşı alınmadı və xal itkiləri ilə üzləşdik.

 

- Hazırda çempionatda fasilədi. Sizcə, bu fasilə “Simurq”a çempionatın qalan dövründə mənfi təsir göstərməyəcək ki?
- Düşünmürəm. Əksinə, daha yaxşı olacağına ümid edirəm. Ona görə ki, mövsümün əvvəli ilə müqayisədə indi bir-birimizə daha yaxınıq. Məsələn, mən komandada əvvəllər cəmi bir neçə futbolçu ilə ünsiyyət qura bilirdim. İndi isə tam bir vahid komanda olmuşuq.

 

- Son turda “Rəvan” üzərində çox çətinliklə qələbə qazandınız, amma sonradan rəqibinizə texniki məğlubiyyət verildi...

- Həmin oyun həqiqətən də çətin alındı. Mümkündü ki, bəziləri daha asan olacağını gözləyirdi. Çünki bakılılar turnir cədvəlinin son pillələrində gedirlər. Amma onların nə qədər yaxşı rəqib olduqlarını həmin görüş də göstərdi.

 

- Sizcə, ilk altılıqda hansı komandalar yer alacaqlar?
- Hazırda buna “Simurq”, “İnter”, “Qarabağ”, “Neftçi” və “Qəbələ” daha yaxındı. Amma altıncı vəsiqə uğrunda güzəştsiz mübarizə gedir. Ona görə də bunu müəyyənləşdirmək çətindi.

 

- Azərbaycan çempionatı sizdə necə təəssürat yaratdı?
- Məncə, azarkeşlərin oyuna gəlməməsi daha çox diqqət çəkir. Dolu tribunalar qarşısında oynamaq daha xoşdu. Azərbaycanda insanların oyuna gəlməməsinə çox təəccübləndim. Ən qəribəsi odu ki, onların futbolla maraqlanmadığını da demək olmur. Maraq çoxdu, lakin stadiona getmirlər. Polşada belə deyil. Hətta autsayderlərin oyununa çoxlu azarkeş gəlir.

 

- Bu yaxınlarda Polşa mətbuatında belə məlumat yayıldı ki, qardaşınız Filip Burhard da Azərbaycan klubuna keçir. Bu, doğrudu?
- Mən qardaşımla bu haqda danışdım. Amma biz bu informasiyanın kim tərəfindən yayıldığını bilmirik. Yeri gəlmişkən, mən Azərbaycan mətbuatında demədiyim fikirlərlə tez-tez rastlaşıram.