Berti Foqts yığmamıza polşalı futbolçu çağırır

“Simurq”un qapıçısı David Petrkeviçə Azərbaycan yığmasında oynamaq təklif olunub. Azerisport.az xəbər verir ki, bu barədə Polşa mətbuatı məlumat yayıb.

 

Məlumatda bildirilir ki, Zaqatala klubunun heyətində uğurlu mövsüm keçirən polşalı qapıçıya şəxsən baş məşqçi Berti Foqts özü maraq göstərir. Məsələyə Petrkeviç özü də münasibət bildirib:

“Etiraf etməliyəm ki, ilk dəfə Azərbaycan yığmasında oynamaq təklifini alanda, çox təəccübləndim. Bayram vaxtı bu haqda çox düşündüm. Bir tərəfdən mən polyakam. Digər tərəfdən isə əksər oyunçular belə fürsət düşəndə başqa ölkələrin yığmasının şərəfini qoruyurlar. İstənilən halda yığmada oynamaq şərəfdi”.

 

Lakin “Simurq”un qapıçısı hələ yekun qərarı qəbul etmədiyini bildirib. David milliləşdirilməsinə razılaşsa, komandamızın fevral ayında Dubayda baş tutacaq hazırlıq prosesinə qatıla bilər.

Maraq üçün onu da bildirək ki, Petrkeviç bu mövsüm “Simurq”un heyətində 16 oyuna çıxıb. Əvvəllər isə o, vətənində “Stal”, “Poloniya”, eləcə də Çexiyanın “Banik” və “Primorye” klublarında çıxış edib.