Ceyhun Sultanov: Qəbələ mənə görə Sumqayıta transfer haqqı ödəməyəcək

Xəbər verdiyimiz kimi, “Sumqayıt”ın yarımmüdafiəçisi mövsümün qalan hissəsini “Qəbələ”də keçirəcək. Azerisport.az saytına müsahibəsində təcrübəli futbolçu bu keçidindən danışıb.

“Bu transferin mənim üçün gözlənilməz olduğunu deməzdim. Klub rəhbərliyi mənimlə əlaqə saxladı. Bu təklifdən imtina etmək olmazdı. Çünki daha ambisiyalı klubda oynamaq istəyirdim. Bu da bir şans idi. Hələ yeni klubumla müqavilə bağlamamışam. Amma yanvarın 7-də münasibətlərimizi rəsmiləşdirəcəyik. Ya bir il, ya da ilyarımlıq müqavilə bağlayacağıq”.

 

“Mənim “Sumqayıt”la müqaviləmin müddəti yayda başa çatacaqdı. Amma müqavilədə belə bir bənd var idi ki, yarım ildən sonra başqa komandaya keçmək istəsəm, rəhbərlik buna mane olmayacaq. Ona görə də “Qəbələ” mənə görə “Sumqayıt”a heç bir transfer haqqı ödəməyəcək. İstənilən halda “Sumqayıt” rəhbərliyinə təşəkkürümü bildirirəm. Bu komandadakı altı ayım çox yaxşı keçdi”.

33 yaşlı yarımmüdafiəçi özünü heç də yaşlı hesab etmir: “Qəbələ”də hədəfim əsas heyətə düşmək olacaq. Bu, asan olmayacaq. Çünki komandanın möhkəm heyəti var. Lakin bir halda ki, məni komandaya dəvət ediblər, deməli, onlara lazımam. “Sumqayıt”ın 20 xal toplamasına kömək edə bildimsə, “Qəbələ”nin də ilk altılığa düşməsində pay sahibi ola bilərəm. Baxmayaraq ki, bu, çətin olacaq. Çünki ilk altılıq uğrunda çox ciddi mübarizə gedir”.