Sebastyan Milya: Bu, onun və Neftçinin nə qədər qeyri-peşəkar olmasından xəbər verir

Polşanın “Slensk” klubunun yarımmüdafiəçisi Sebastyan Milya Azərbaycan çempionu “Neftçi”yə keçəcəyi barədə xəbərləri təkzib edib. Azerisport.az saytına müsahibəsində o, bunları dilə gətirib:

“Siz nə vaxtsa məndən “Neftçi”yə keçəcəyim barədə söz eşitmisiz? Mən belə söz deməmişəm. Düzdü, mənə Azərbaycana təklif olub. Amma bu, o, demək deyil ki, mənə yalnız bu klubdan təklif gəlib. Bəlkə, “Neftçi” özünü Azərbaycanın yeganə klubu hesab edir”?

Maraq üçün bildirək ki, bir müddət öncə “Neftçi”nin vitse-prezidenti Tahir Süleymanov da Milyanı transfer etmək istəmələri barədə xəbərləri qətiyyətlə təkzib etmişdi. Özü də o, Milyaya ehtiyac duymadıqlarını kəskin şəkildə bildirmişdi: “Milya kimdi ki, biz ona 450 min avro ödəyək? Biz bu futbolçuya heç 4,5 avro da ödəmərik”.

Görünür, Milya da məhz həmin açıqlamadan sonra belə kəskin reaksiya verməyi qərara alıb: “Messiyə Ronaldonun onun haqda nə düşünməsi maraqlı olmadığı kimi, mənə də “Neftçi”də haqqımda nə düşündükləri maraqlı deyil. Əgər onların vitse-prezidenti belə açıqlama veribsə, bu, onun və klubunun nə qədər qeyri-peşəkar olmasından xəbər verir”.